Majburiy ijro byurosining Kun.uz’ga ma'lum qilishicha, Qashqadaryo viloyatining Chiroqchi tumanida ota bir nafar farzandining alimenti uchun 45 mln so‘m to‘lab bergan.
Fuqarolik ishlari bo‘yicha Chiroqchi tuman sudining qaroriga asosan 1 nafar voyaga yetmagan farzandining moddiy ta'minoti otaga yuklatilgan bo‘lib, MIB tuman bo‘limi xodimlari tomonidan qarzdor aliment to‘lovlarini to‘lashi yuzasidan ogohlantirib kelingan bo‘lsa-da, ota sud buyrug‘ida belgilanganidan ko‘ra kam miqdorda aliment to‘lab kelgan.
Mas'ul davlat ijrochisi tomonidan qarzdor bilan profilaktik suhbatlar olib borilib, qonunchilikda belgilangan javobgarlik yuzasidan tushuntirish berilgan. Natijada fuqaro alimentdan bo‘lgan barcha qarzini to‘lash bilan birga farzandi voyaga yetguniga qadar hisoblangan aliment pulini to‘lash istagini bildirgan.
13 aprel kuni kelishuv bitimi asosida qarzdor ota tomonidan to‘langan 45 mln 200 ming so‘m aliment puli sobiq rafiqasiga topshirilgan.
Avvalroq bulung‘urlik ota farzandining alimenti uchun 200 million so‘m, sirdaryolik ota mashinasi xatlangach, farzandlariga 31 million so‘m aliment to‘lab bergan, alimentni o‘z vaqtida to‘lamagan andijonlik ikki nafar ota 15 sutkaga qamalgan edi.
Bundan tashqari, Samarqandda alimentdan qarz bo‘lgan ota 67 million so‘m qarzini to‘lab, farzandlariga uyini ham bergan bo‘lsa, Qo‘qonda aliment to‘lovi o‘rniga «Spark», Buxoroda esa uy va «Nexia-2» kalitlari topshirgan edi.
