Лашкаракда ноқонуний ишлаган зиплайнда икки киши тўқнашиб кетди

Тошкент вилояти Ангрен шаҳри яқинидаги тоғли ҳудуд – Лашкаракда зиплайн учган икки киши тўқнашиб кетди. Фавқулодда вазиятлар вазирлиги хабарига кўра, тўқнашган одамлар жароҳат олмаган, зиплайннинг ўзи эса ноқонуний фаолият юритиб келган.

Ижтимоий тармоқларда тарқалган видеодан кадр

Ҳодиса видеолари 14 май куни эрталаб ижтимоий тармоқларда тарқалди. Унда номаълум сабабга кўра зиплайн (тросли тушиш аттракциони) тросида тўхтаб қолган бир кишига ортидан келаётган иккинчи одам келиб урилганини кўриш мумкин.

Текширув жараёнида маълум бўлишича, мазкур аттракцион тегишли ташкилотларнинг ҳеч қандай рухсат берувчи ҳужжатларисиз, ноқонуний фаолият юритиб келган.

ФВВ хабарига кўра, “Лашкарак” МФЙдаги бу зиплайн 2026 йил 15 январ куни ўрганилиб, далолатнома расмийлаштирилган ва узилган, лекин зиплайн фаолияти ўзбошимчалик билан яна тиклаб олинган.

14 май куни масъуллар назорати остида зиплайн трослари узиб ташланди.

14 май куни ҳодиса жойига ФВВ ва бошқа идоралар вакиллари етиб борган. Ишчи гуруҳ хулосасига кўра, зиплайн демонтаж қилиниб, аттракцион фаолиятини ташкил этган фуқароларга нисбатан жарима қўлланилган.

“Фурсатдан фойдаланиб, ФВВ мутахассислари фуқароларни тегишли давлат идораларидан расмий рухсат олмасдан, ноқонуний фаолият олиб бораётган аттракционларда учмасликка чақиради.

Ҳурматли фуқаролар, ноқонуний фаолият олиб бораётган аттракционлардан фойдаланиш орқали ўз ҳаётингизни хавф остига қўяётганингизни унутманг”, – дейилади ФВВ баёнотида.