Бухорода 2та шамол электр станцияси қурилмоқда – у 1 миллион хонадонни ток билан таъминлайди 

Энергетика вазирлигининг хабар қилишича, Бухоронинг Ғиждувон ва Пешку туманларида қуввати жами 1000 МВтга тенг бўлган шамол электр станциялари қурилиши бошланди.

Маълум қилинишича, Саудия Арабистонининг Acwa Power компанияси лойиҳани амалга ошириш учун Ўзбекистон миллий электр тармоқлари компанияси билан 25 йиллик шартнома имзолаган. 

Acwa Power Uzbekistan компанияси директори Бахтиёр Эшнаевнинг сўзларига кўра, шамол электр станцияларини молиялаштириш халқаро молия институтлари кўмагида амалга оширилади. 

“Бухоро вилояти шамол электр станциялари учун жуда маъқул жой ҳисобланади. Шунинг учун “Баш” ва “Жанкелди” шамол электр станциялари Бухоро вилоятида жойлашади. Бунинг афзаллиги, шамол тун-у кун эсиб туради ва тун-у кун электр энергияси ишлаб чиқариш имконини беради. 1 ГВт (1000 МВт) қувватга эга станциялар  республикада ишлаб чиқарилаётган 6,3 фоиз электр энергиясига тўғри келади”, – деди у “Ўзбекистон 24” каналига берган интервьюсида. 

Вазирлик матбуот хизмати маълумотларига кўра, станциялар йилига 3,6 миллиард КВт электр энергияси ишлаб чиқаради, бунинг натижасида (йилига) 1,1 млрд куб табиий газ иқтисод қилинади. 

Шу билан бирга,  шамол электр станциялари 1 миллион хонадонни электр энергияси билан таъминлайди. 

Эслатиб ўтамиз, Бухоронинг икки туманида шамол электр станцияларини қуриш бўйича президент фармони 2021 йилда имзоланган. 

Унга кўра, Acwa Power компанияси инвестиция лойиҳаларини амалга ошириш бутун даври мобайнида шамол электр станциясини лойиҳалаштириш, молиялаштириш, қуриш ҳамда эксплуатация қилиш, ҳар бир инвестиция лойиҳаси бўйича юзага келиши мумкин бўлган хавф-хатарларни ўз зиммасига олган ҳолда, жами дастлабки баҳолаш бўйича 650 млн АҚШ доллари миқдорида тўғридан тўғри хорижий инвестиция жалб этиш мажбуриятини олган. 

Аввалроқ, 3та фотоэлектр станцияларини қуриш бўйича тендер ғолиблари маълум қилинганди. У 2024 йилгача  Бухоро вилоятида 250 МВ, Хитойнинг GD Power-Powerchina консорциуми Наманган вилоятида 150 МВ ва Франциянинг Voltalia SA компанияси Хоразм вилоятида 100 МВ қувватга эга фотоэлектр станцияларини қуради.