Фарғонада маст ҳайдовчи икки инсоннинг умрига зомин бўлди

Ҳайдовчи икки кишини уриб юбориб, ҳодиса жойидан қочиб кетган.

Фото: Видеодан кадр

Фарғона вилояти Тошлоқ туманида маст ҳолда машина бошқарган ҳайдовчи икки кишининг ўлимига сабаб бўлди. Бу ҳақда ИИВ ЙҲХББ ахборот хизмати хабар бермоқда.

“Миллар” информацион дастурида берилган лавҳада айтилишича, Қува-Марҳамат автомобил йўлининг Тошлоқ туманидан ўтган қисмида ҳайдовчи Дамас машинасини маст ҳолда катта тезликда бошқаради.

Аввал йўл четида велосипедда кетаётган фуқарони, сўнг йўлнинг нариги четида турган 5 ёшли қизчани уриб юборган ва воқеа жойидан қочиб кетган.

Оқибатда велосипедда кетаётган отахон воқеа жойида, қизча эса шифохонада вафот этган.

Хабарда ҳайдовчи ушланганми ёки йўқми, бунга ойдинлик киритилмаган.