2024 йил сентябр ойида Ню Йорк мэри Эрик Адамсга нисбатан коррупция иши бўйича айблов эълон қилинди. Даставвал у сайлов кампанияси учун Туркиядан ноқонуний хайрия маблағларини олганликда гумонланаётган эди. Кўп ўтмай тергов Адамснинг нафақат Туркия, балки Исроил, Қатар, Хитой, Жанубий Корея ва Ўзбекистон билан алоқаларини ҳам қамраб олгани маълум бўлди.
The City нашрига кўра, Ню Йоркда ўз бизнесига эга асли ўзбекистонлик тадбиркор Толиб Мансуров бу ишда фигурантлардан бирига айланган.
“Эрик Адамснинг мамлакатдаги энг катта шаҳар мэри сифатидаги статусидан фойдаланган ҳолда Ўзбекистондаги ҳокимият ҳақида шаклланган салбий қарашларни юмшатишда, Бруклин туманидан бўлган бир бизнесмен Ўзбекистон ҳукуматининг прокси вакили вазифасини бажарганликда гумонланмоқда”, дея ёзади нашр тергов материалларига асосланган ҳолда.
Қайд этилишича, Толиб Мансуров сайловолди кампаниясида Эрик Адамсни қўллаш учун ноқонуний хайриялар ташкил қилганликда гумон қилиняпти.
Прокурорларга кўра, сайланган мэр бу ёрдам эвазига ўзбек етакчиларини йиғган ҳолда шаҳар мэриясида тадбир ўтказган, Боулинг Грин номли паркда Ўзбекистон байроғини тантанали кўтариш маросимини ташкил қилган, шунингдек, Мансуров ва қурилиш бошқармаси ўртасидаги низода Мансуровга кўмак берган.
Тадбиркорнинг иддао қилинаётган миссияси (“шаҳар мэрига хорижий мамлакат номидан таъсир ўтказиш”) – терговчилар бир неча йилдан бери ўрганиб келаётган Адамснинг хайрия жамғариш амалиётларидаги бошқа яширин ҳаракатларга ўхшаб кетади, дея қайд этади манба.
Прокурорлар гумонича, Мансуровнинг бу миссиясидан мақсад – Ню Йорк мэрининг обрўсидан фойдаланиб, Ўзбекистоннинг репутациясини яхшилаш бўлган.
Терговчилар Эрик Адамс ва Туркия манфаатларини ифода этувчи турк диаспораси вакиллари ўртасидаги алоқаларга ҳам худди шундай гумон билан қараяпти.
