Президент қарори билан ташкил этилган Мажбурий ижро бюроси зиммасига электр энергияси, газ ва сув учун қарздорлардан тўловларни ундириш юклатилган. Айни кунда бу идора фаолиятидан норозилик ҳолатлари пайдо бўлмоқда.
МИБ тадбиркор билан қасдлашганда...
Муаммонинг аввали
Ҳаммаси мана бундай бошланди. Бир ой олдин, яъни 26 июль куни Бўз туманида фаолият юритаётган «Бўз сут дарёси» корхонасига туман МИБ вакиллари кириб келади. Уларнинг қўлида корхонанинг электр энергиясидан 644 минг қарздорлик ҳақида маълумот бўлиб, улар ишлаб чиқариш корхонасини электр тармоғидан зудлик билан узишга киришади. Корхона раҳбари июнь ойида икки миллиондан ортиқ олдиндан тўлов қилгани ва 1 июль бошида 1 миллион 750 минг маблағи бўлганини билдириб, айни пайтда корхонанинг қарздор эканидан бехабарлиги, башарти электр таъминоти узиладиган бўлса кўплаб тадбиркорлар билан тузилган шартнома шартлари бажарилмай қолиши ва корхона катта зарар кўришини айтиб, МИБ ходимларига юзланади. Ходимлар: «Бизга корхонани узишни юқоридан айтишган!» дея тушунча берадилар.
Шу ўринда корхонанинг қарздорлик юзасидан огоҳлантирилмаганини эслатиб ўтамиз. Далолатнома тузилмай, МИБ ходимлари кетади ва бироздан сўнг қайтиб келиб, барибир электрни узишади. Корхона ҳисобчиси зудлик билан 700 минг сўм тўлов қилиб, туман МИБ идорасига борганида, назорат қилувчи орган вакили энди қайта улаш учун энг кам иш ҳақининг 10 бараварида жарима тўлангандан сўнг электр уланишини айтади. Корхона вакилларининг: «Қоида бўйича бизни беш кун олдин огоҳлантиришинглар керак эди-ку?», деган саволига туман МИБ ўринбосари Оятилло Ибрагимов: «Қонун ўз йўлига, туманда биз билан келишган тадбиркор ишлайди!», дея «изоҳ» берган.
Дарҳақиқат, ҳар қандай жамиятда қонун ва қоидалар устувор бўлиши керак. Мажбурий ижро бюроси янги иш бошлаган ташкилот. Юридик ташкилот ва аҳолининг катта қисми бюро фаолияти ҳақида ОАВ орқали бошланғич тушунчага эгалар, холос.
МИБ босими
Корхонанинг қонун бўйича талаблари туман МИБ бошлиғига етиб боргач, Улуғбек Камоловнинг шахсан ўзи «қонунбилгич» ва «қайсар» тадбиркорни «маҳв» этгани ва бу ерда ким хўжайин эканини кўрсатиб қўйиш учун корхонага кечқурун (соат 22:00) ташриф буюради. Ҳозирги кун тадбиркори ҳам қўл қовуштириб турадиган анойилардан эмас. Ўз ҳуқуқларини билишини, МИБ бошлиғи ярим кечаси огоҳлантиришсиз келиб: «Барча ишчиларни йиғиб кел!», деб буйруқ беришга ҳақи йўқлигини айтади. Тадбиркор ўзича, айни пайтда корхонанинг электрдан қарзи йўқлиги ва банк орқали ўтказилган тўлов топшириқномалари нусхаларини МИБ бошлиғига кўрсатсам фойда беради, деб ўйлайди. Лекин бу Улуғбек Камоловнинг жаҳлини бадтар чиқарди, холос. Яна МИБ ходимлари томонидан қоғозбозлик, яна далолатномалар тузиш, дўқ-пўписалар бошланади.
