Ўзбекистон Бош прокуратураси делегацияси Остонада молиявий жиноятларни тергов қилиш мавзусидаги тренингда қатнашди

Ўзбекистон Бош прокуратураси делегацияси Қозоғистон Бош прокуратураси таклифи билан Остонага амалий ташриф билан келди. Ўзбекистон вакиллари “Халқаро алоқаларга эга молиявий жиноятларни тергов қилиш” мавзусидаги халқаро семинар-тренингда иштирок этдилар. Семинар-тренинг Европа хавфсизлик ва ҳамкорлик ташкилоти дастурларининг Остонадаги офиси ва АҚШнинг Қозоғистондаги элчихонаси кўмагида ўтказилди. Бу ҳақда uzdaily.uz хабар бермоқда. 

Семинар-тренингдан мақсад трансмиллий молиявий жиноятларни тергов қилиш ва ноқонуний активларни қайтариш соҳасида мутахассисларнинг малакасини ошириш, тажриба алмашиш, юқори малакали ва билимга эга ходимларни тайёрлашдан иборат бўлди.

5 кунлик тренингда шунингдек Қозоғистон, Қирғизистон, Тожикистон ва Покистон ҳуқуқ-тартибот идоралари ходимлари ҳам иштирок этдилар.

Ташриф доирасида Ўзбекистон Бош прокуратураси Олий ўқув курслари ва Қозоғистон Бош прокуратураси ҳузуридаги Ҳуқуқ-тартибот идоралари академияси ўртасида меморандум имзоланди.

Меморандумда таълим, илмий-тадқиқот ва инновация соҳаларида ҳамкорликни амалга ошириш кўзда тутилган.

Бундан ташқари, Ўзбекистон делегацияси вакиллари Қозоғистон прокуратураси органлари тизимида амалга оширилаётган ислоҳотлар ва уларнинг натижалари билан танишишди.