Андижонда Ашхобод–2017 Осиё ўйинларининг ғолиб ва совриндорлари тантанали кутиб олинди

Андижон шаҳридаги Бобур майдонида Туркманистон пойтахти Ашхободда 17-27 сентябрь кунларида бўлиб ўтган усти ёпиқ иншоотлардаги Осиё Ўйинларида Ўзбекистон терма жамоаси сафида иштирок этган вилоят спортчиларини тантанали кутиб олиш маросими бўлиб ўтди.

Ўзбекистонлик спортчилар турнирда жами 131та медалларга эга чиққан бўлсалар, шундан 3 та олтин, 10 та кумуш ва 8 та бронза медаллари Андижон вилояти вакиллари томонидан қўлга киритилди. Вилоят атлетлари спортнинг оғир атлетика, белбоғли кураш, эркин кураш, самбо ҳамда юнон-рум кураши турларида совриндор бўлдилар. Жумладан курашчилардан Илҳомжон Машрапов 1 та олтин, 1 та кумуш ва 1 бронза, эркин кураш турида Гулхуморой Дадабоева эса 2та кумуш ва 1 та бронза медалларини қўлга киритди.

Маросимда сўзга чиққан вилоят ҳокимлиги вакиллари, фаҳрий спорт мураббийлари, жамоатчилик вакиллари спорт мусобақаларида ютуққа эришган йигит ва қизларга ўз миннатдорчиликларини билдирдилар.

KUN.UZ мухбири Элмурод Эрматов, Андижон.
Муаллиф олган суратлар.