Тошкентдан Андижонга отланган поезд 2 соату 25 дақиқага кечикди. Айб кимда ё нимада?

Бугун (27 октябрь) эрталабдан Тошкентнинг Шимолий вокзалидан Андижон томон йўлга тушадиган поезд ўз вақтида йўлга чиқмади. Андижонга хизмат сафари билан бораётган поезд йўловчиларидан бири таҳририятимизга йўлда бўлиб ўтаётган воқеа-ҳодисаларни бирма бир узатиб турди.

Тошкентдан эрталаб 8:05 да йўлга тушиши ва Андижон вокзалига соат 13:35 да етиб бориши керак бўлган поезд соат 9:15 да секин, тошбақа юриш қилиб йўлга тушди. График бўйича 1 соату 10 дақиқадан сўнг. Унгача манба поезднинг қачон юриши, умуман юриш-юрмаслиги номаълум, деб билдириб турган эди.

Умуман, ушбу йўналишдаги поезддан фойдаланувчи бошқа ўқувчиларимизнинг ҳам билдиришича, Андижондан Тошкентга келишда поезд ҳеч қачон вақтида етиб келмайди. Тошкентдан Андижонга кетишда ҳам кўп юз беради бу ҳолат. Энг қизиғи, ҳеч қачон ҳеч ким бунинг сабабини тушунтирмайди, кечирим сўрамайди, вагондаги йўловчиларга сув бермайди, чой бермайди.

1005 рақами ҳеч қачон мурожаатга жавоб бермайди, «Ўзбекистон темир йўллари»нинг 237-99-98 ишонч телефони ҳам тайинли жавоб бермайди. Бугун ҳам ишонч телефонига қўнғироқ қилинганида «ҳамма раҳбарлар мажлисда, мажлисдан чиқса, жавоб берар» деган жавобни олишган.

09:24. «Поезд озгина юриб Жанубий вокзалда туриб қолди. Одамлар чиптанинг пулини қайтаришни талаб этишмоқда. «Пулимни бер, тушаман» деб талаб қилаётганлар бўляпти. Атай одамлар чиптанинг пулини талаб қилишмасин, деб юриб юборди, энди тўхтаб-тўхтаб кетяпмиз»

10:53. «Тўхтаб тўхтаб кетяпмиз»

10:54. «Хизмат кўрсатиш расво»

10:55. «Чой ҳам берилгани йўқ ҳалигача. Олдинлари соат 8:30 дан чой бериларди».

11:01. «Аблик деган бинонинг олдида тўхтаб турибмиз. Светофорда муаммо дейишяпти».

11:08. Ҳали ҳам турибмиз

11:09. «Светофор дейишди-ю, лекин қарама-қаршидан поезд ўтиб кетди. Алдашибди, рўпарадан келаётган поездни кутибмиз. Юрдик».

Ўзи бутун темир йўл тизимида иш расво, дейиш ярамайди. Чунки Тошкент — Самарқанд йўналишида бундай муаммоларни жуда камдан-кам эшитамиз. Балки, водий томон элтувчи йўлда муаммо бордир. Балки ростдан ҳам йўл янгилигига «наладка» туфайли кечикишлар, узилишлар рўй бераётгандир, деган савол ҳам туғилди...

«Йўқ, йўл «наладка» бўлганига 1,5 йил бўлди, — дея тушунтирди поезддан фойдаланган йўловчилардан бири. — Муаммо асло йўлда эмас, режим ва график йўқлигида. Поездлар қарама-қарши келиб қолади, графиклар тўғри тузилмаган. Соатлаб кичик станцияларда турилади».

Вазиятни таҳлил қилган ўқувчиларимиздан бири шундай тушунтириш берди:

«Бугун ҳам Жанубий вокзалда рўпарадан келаётган поездни ўтказиш учун турилган, аслида. Шимолий вокзалда нега 1 соатдан ортиқ вақт турилганининг сабаби эса номаълум. Бутун дунёда бор бу масала, лекин графикни аниқ қилиб белгилаш орқали ечилади бундай муаммолар. Ўша рўпарадан келаётган поезд ҳам ўз вақтида юрмагани учун бу поезд ушлаб турилади ва ҳ.к. Чунки булар умуман графикка амал қилишмайди. Масалан, мана шу поезд ортига қайтиши ҳам камида уч соатга кечикади. Андижонда Тошкентга келишни ўйлаб чипта олганлар ҳам энди сиқилиб кутишади. Ва қайтишда ҳам ўнлаб бошқа поездлар билан рўпара келиб қолинади ва кечиккан поезд янада кечикади. Буни тушуниш ва тасаввур қилиш учун катта ақл керак эмас».

12:11. «Довондамиз».

12:13. «Туннелга киряпмиз».

13:39. «Попга келдик».

14:24. «Қўқонга келдик. Ҳозирча 2,5 соатга кечикяпмиз.

15:43. «Асакада бўлсак керак. Қайтиш соат 15:15 эди. Тошкентга кетадиганлар қон бўлаётгандир кутиб. Ҳали бориб булар 1 соат вагонни тозалашади».

15:44. «Камида соат 17:00 ларда кетади энди».

Хулоса ўзингиздан. Биз шу поезд вагонида бўлган ишончли одам орқали воқеаларнинг борини келтирдик, айнан дақиқасигача ёздик. Мутасаддилар эса бу вазиятга қандай тушунтириш беришлари барчага бирдек қизиқ. Ўқувчиларимизга ҳам, таҳририятга ҳам, ўша поездга чипта харид қилган истеъмолчиларга ҳам.

Ш.Шокиржонов тайёрлади.