Қирғизистонликлар янги президентдан нималар кутмоқда?

Фото: President.kg

Қирғизистондаги «Демократия ва фуқаролик жамияти учун коалиция» жамоат ташкилоти 10-18 ноябрь куни аҳолининг янги президентга нисбатан кайфиятини билиш мақсадида умуммиллий ижтимоий сўров ўтказди.

Ҳисоботга кўра, Қирғизистон фуқароларининг 26,8 фоизи Сооронбай Жээнбековнинг президент лавозимига келиши билан ҳеч қандай жиддий ўзгаришлар юз бермаслигига ишонч билдиришган.

39,7 фоиз респондентларнинг фикрича, мамлакат 2017 йилнинг 1 декабридан сўнг тез ривожлана бошлайди, Жээнбеков бу санада давлат раҳбари мақомида лавозимларини бажаришга киришади.

Аҳолининг ижобий кайфияти сентябрь ойида, сайловлардан аввал ўтказилган сўров натижалари билан таққослаганда анча тушиб кетган.

«Сентябрь сўровида респондентларнинг 57,6 фоизи янги президент сайланганидан сўнг мамлакатда яхши ўзгаришлар бўлишига ишонишган. Бу борада ниманидир ўзгаришига ишонмаганлар эса 12,5 фоизи эди», - дейилади ҳисоботда.