«Реал» «Севилья»га «ўт қўйди», «Барселона» «субмарина»ни «чўктирди». Ла Лигада тур якунлари

«Трибуна» Испания чемпионатининг 15-тури учрашувларига тўхталиб ўтади.

Тенглик фақат қоғозда

Зинедин Зидан жамоаси Севильяда жавобсиз 5 гол урди. «Сантьяго Бернабеу»да «Севилья»га қарши ўйин олдидан Криштиану Роналду ўзининг бешинчи «Олтин тўп»ини намойиш этди. Ҳафта бошида Парижда мукофотни қабул қилиб олган Роналду энди бу борада Лионель Месси билан тенглашиб олган. «Реал» футболчилари ўз жамоадошларини табриклаб, кучли рақибга қарши ўйинни йирик ҳисобдаги ғалаба билан якунлашди.

«Севилья» дарвозасига урилган голларнинг иккитасига Роналдунинг ўзи муаллифлик қилди, шунингдек, Кроос, Начо ва Ҳакими биттадан гол уришди. Бензема эса биринчи голда Начони пас билан таъминлаш билан кифояланди. Унинг ўзи бош билан зарба берган вақтда эса тўп дарвоза тўсинидан қайтди. Бу ғалабадан кейин «Реал» турнир жадвалида 31 очко билан тўртинчи ўринда, биринчи ўриндаги «Барселона» билан орадаги фарқ 8 очкони ташкил этади.

Лекин «Реал» бу «манита»дан (бир жамоага беш гол уриш Испанияда шундай аталади) кейин БААдаги клублар ўртасидаги жаҳон чемпионатига хуш кайфият билан йўл олишини таъминлади. Мадридликлар охирги марта «Севилья»га 5та голни 1993 йилда уришганди, ўшанда севильяликлар таркибида Марадона ва Симеоне тўп сурарди.

Месси Мюллерни қувиб етди

«Вильярреал» дарвозасига урилган голлардан бирига муаллиф бўлган Лионель Месси каталонлар клуби сафида урилган голлари сонини 525тага етказди. Аргентиналик ҳужумчи бу орқали ўтган асрда «Бавария» сафида шунча гол уриб, бир жамоа сафида энг кўп гол уриш бўйича рекордчига айланган Герд Мюллерга тенглашиб олди.

Сафар ўйинида каталонияликлар аввалига ҳеч қанақасига «сариқ субмариналар» мудофаасини буза олмаётганди. Аммо ўйиннинг 60-дақиқасида мезбонлар ҳимоячиси Даниел Раба ўйиндан четлатилди ва сондаги устунликдан меҳмонлар фойдаланиб қолишди. Аввалига Луис Суарес, кейинроқ Лионель Месси дарвозани ишғол қилди ва жамоага навбатдаги 3 очко келтирилди.

Валенсиядаги «ўғирлик»

«Месталья»да пенальтидан урилган гол туфайли ютқазган (1:2) «Сельта» футболчилари ўйиндан кейин ҳакамдан норози бўлишмоқда.

Меҳмонлар жамоаси сардори Уго Мальо шундай деди: «Бизни талашди. Яхшиси бу ҳакам (Мунуэра Монтеро) бизнинг ўйинларни бошқа бошқармасин. У ҳамиша бизга ёқимсизлик келтиради».

Ўйиндаги ягона гол муаллифи Яго Аспас ҳам ўз фикрини билдирди: «Кейинги сафар биз учинчи формамизни кийиб чиқамиз. Биз «Сельта» эканимизни билишмагани яхши. Шунда бизга бундай пенальтилар қўйишмайди».

«Кўршапалаклар» мухлислари эса Аспасга апрель ойидаги ҳаракатларини эслатиб қўйишди. Ўшанда Аспас симуляция қилиб пенальти ишлаган ва гол урган, бу гол эвазига «кельтлар» Валенсиядан 2:2 ҳисобидаги дуранг билан қайтишганди. Уларнинг фикрича, бу ўринда адолат қарор топди.

«Атлетико» тарихга кирди

«Бетис» устидан сафарда қийинчиликсиз ғалабага эришган «Атлетико» икки рекорд ўрнатди. Мадридликларнинг мағлубиятсиз серияси 19 ўйинга етди (12 ғалаба ва 7 дуранг). Симеоне жамоаси охирги марта апрелда «Вильярреал»га ютқазганди (0:1). Шунингдек, сафар учрашувларидаги мағлубиятсиз серия давом этмоқда - 20 ўйин (12 ғалаба ва 8 дуранг). Охирги марта «матрасчилар» 2016 йилнинг 12 декабрида сафардаги ўйинни бой беришганди. Ўшанда ҳам «Вильярреал»дан мағлуб бўлинган (0:3).

Энг кекса «шер»

«Леванте» - «Атлетик» учрашувида (1:2) ҳисобни очган Ариц Адурис «шерлар» жамоаси тарихида гол урган энг ёши катта футболчига айланди. У бу пайтгача рекорд соҳиби Пир Гаинсага тегишли эди (36 ёшу 298 кун). Адурис пенальтидан навбатдаги голини урганида ундан 4 кунга катта эди. «Атлетик» Ла Лигада кейинги икки ойдаги илк ғалабасига эришди (охирги ғалаба 14 октябрь куни «Севилья»га қарши ўйинда қайд этилганди - 1:0). Сафар учрашувларида эса бильбаоликлар августдан буён ғалаба нималигини билмаётганди, сафар учрашувларидаги охирги ғалаба август ойида «Эйбар»га қарши ўйинда рўй берганди (1:0).

Ла Лигада 15-тур ўйинлари