Дунёдаги энг катта нефть экспортёри ҳисобланган Саудия Арабистони 26 июль куни нефть ташувини Қизил денгиздаги Боб ал-Мандиб орқали амалга оширмай туришини маълум қилди. Бу ҳақда мамлакат Энергетика вазири Холид ал-Фалиҳ маълумот тарқатган.
«Саудия Арабистони Боб ал-Мандиб орқали ўтувчи барча нефть ташувини номаълум муддатгача бекор қилади. Боб ал-Мандибдаги вазият аниқлаштириб, ҳудуд хавфсиз бўлишини кутамиз», дейилади вазирнинг баёнотида.
Ямандаги ҳусийлар ҳаракати аъзолари ҳужум қилган, деб кўрилаётган иккита нефть ташувчи катта танкерлар айнан Саудия Арабистонга тегишли эди.
Айни пайтда Яманда Саудия қироллиги оиласи томонидан қўллаб-қувватланаётган коалиция асосан шиалардан ташкил топган ҳусийлар гуруҳи билан уч йилдан буён курашиб келмоқда.
Сувайш канали орқали Европага етказиб бериладиган нефть фуқаролар уруши гирдобида қолган Яманнинг қирғоқларидан олиб ўтилади. Саудия Арабистони ушбу вазиятда минтақавий рақиби Эронни айблайди. Бироқ, бу доим инкор этиб келинган.
