Саудия Арабистони делегацияси мухолифатдаги саудиялик журналист Жамол Қошиқчининг Туркияда изсиз йўқолиши бўйича текширув ишларида қатнашиш учун Анқара шаҳрига етиб келди. Бу ҳақда Anadolu агентлиги хабар бермоқда.
Саудия Арабистони вакиллари Туркия ҳуқуқ-тартибот органлари ходимлари ҳамда текширувда қатнашаётган бошқа томонлар билан учрашув ўтказади.
3 октябрь куни The Washington Post нашри учун ишлайдиган журналист Саудия Арабистони консуллигига кириб кетгач, изсиз йўқолгани ҳақида хабарлар тарқала бошлаганди.
У Саудия Арабистони бош консуллигига 2 октябрь куни соат 13:00 атрофида ҳужжатларни расмийлаштириш учун келганди. Уни консуллик ходимлари чақиришганди. У консулликка қаллиғи билан бирга келган, бироқ аёл ичкарига киритилмаган. 5 соатдан кейин эса консуллик ходимларидан бири чиқиб, журналист кетганини айтиб, уни бошқа кутмасликни тавсия қилган.
Журналист консулликка келиши олдидан агар ушланадиган бўлса, бу ҳақда Туркия ҳукумати ва оммавий ахборот воситалари турк-араб уюшмасини хабардор қилишни айтганди.
Туркия ҳукумати журналист ўлдирилганини тахмин қилмоқда.
«Туркия полициясининг дастлабки тахминига кўра, жаноб Қўшиқчи Саудия Арабистони консуллигида ўлдирилган. Фикримизча, қотиллик қасддан содир этилган ва журналистнинг жасади консулликдан олиб чиқиб кетилган», дея туркиялик мансабдор шахс сўзларини келтирган Reuters ахборот агентлиги.
Турклар журналистнинг ўлимида 15 кишидан иборат гуруҳни гумон қилишмоқда.
9 октябрь куни Туркия ҳукумати журналистнинг йўқолиб қолиши воқеасидан сўнг Саудия Арабистонининг Истанбулдаги бош консуллиги биносида тинтув ўтказишга рухсат олди.
Туркия президенти Ражаб Тоййиб Эрдўған саудиялик журналистнинг йўқолиши терговини шахсан кузатиб боришини маълум қилган.
Washington Post нашри хабарига кўра, Туркия ҳукумати АҚШга, гўёки, Саудия Арабистонининг журналист Жамол Қошиқчининг ўлдирилишига алоқадорлигини тасдиқловчи видеоёзувларни кўрсатган.
