Собиқ иттифоқ сарқити ҳисобланувчи меҳнат дафтарчалари бекор қилинади

Ўзбекистон 2019 йилдан собиқ советлар иттифоқидан амалда бўлиб келаётган яна бир кераксиз ҳужжат юритиш амалиётидан воз кечади. Молия вазири ўринбосари Дилшод Султонов журналистлар билан бўлиб ўтган мулоқотда шу ҳақда маълум қилди. Унинг сўзларига кўра, 2016 йилда бошланган жараён келгуси 2019 йилда давом этилади.  

“Меҳнат дафтарчаларини бекор қиламиз. Иттифоқ давридан қолиб кетган, ҳеч кимга кераксиз нарса. 2016 йилда бу борада ишларни бошладик, 2019 йилда давом этамиз. Президент топшириғига мувофиқ, электрон базага ўтилади. Хоҳлаган фуқаро 5 йилдан кейин келиб, паспорт рақамини киритса, иш стажига доир маълумотларни олади”, - дея ойдинлик киритди Молия вазири ўринбосари Дилшод Султонов.

Унинг аниқлик киритишича, меҳнат фаолиятини энди бошлаётганлар учун меҳнат дафтарчаси тушунчаси ёт бўлади. Уларга нисбатан бу ҳужжат юритилмайди. Бунинг самараси, улар 2050-2055 йилларда пенсияга чиқаётганида билинади. Меҳнат дафтарчаси борлар эса, уни юритишда давом этишади. 

“Илгари бўларди, меҳнат дафтарчангга стаж ёзиб бераман, деган гаплар. Энди бунақа нарсаларга ўрин йўқ. Кимсиз, қаерда ишлагансиз, қанча ишлагансиз, бунинг фарқи бўлмайди. Пенсияга чиқаётганда, ойлик маошингиз қонуний бўлган, солиқларни вақтида тўлаган бўлсангиз, шунга яраша нафақа оласиз. Қолаверса, бирор ташкилотда ишлаётгани, ишламаётганига доир маълумотнома ҳам талаб этилмайди. Базадан барча ахборотни олиш мумкин бўлади”, - деди Султонов.