Францияда Интерполнинг собиқ раҳбари йўқолиши бўйича тергов иши ёпилди 

Франция полицияси Интерполнинг собиқ раҳбари Мэн Хунвэйнинг йўқолиши бўйича олиб борилган тергов ишини якунлади. 

Тергов Интерпол бош қароргоҳи жойлашган Лион шаҳри полицияси томонидан олиб борилган. Маълумотларга кўра, тергов жиноят Франция ҳудудида содир этилганига ишора қилувчи бирор-бир далил топмаган. Шунингдек, Хунвэйнинг рафиқаси турмуш ўртоғи йўқолгандан кейин хитойчада таҳдидлар билдирилаётган телефон қўнғироқлари олганининг ҳеч қандай исботи топилмаган.

Октябрь бошида Францияда Хунвэйнинг йўқолиши билан боғлиқ тергов бошланган. Унинг йўқолгани ҳақида рафиқаси хабар қилган. Аёл эри 29 сентябрдан алоқа чиқмаётганини ҳамда ижтимоий тармоқлар ва телефон орқали таҳдидлар олганини таъкидлаган. 

Хунвэй таътили вақтида ўз ватани Хитойга борганда йўқолиб қолган. Кейинроқ Хитой ҳукумати Хунвэй коррупция ишига алоқадорлик гумони билан ҳибсга олинганини маълум қилган.

7 октябрда эса Хунвэй Интерпол раҳбари лавозимидан кетишини сиртдан эълон қилган. Унинг ўрнини вице-президент Ким Чон Ян вақтинчалик эгаллаган.