Бугун, 23 ноябрь куни Тошкент давлат иқтисодиёт университетида Ўзбекистоннинг энг яхши олимларини тақдирлаш маросими бўлиб ўтди. Тадбирни Ўзбекистон Республикаси Бош вазир ўринбосари Азиз Абдуҳакимов очиб берди.
“Сўнгги вақтларда Ўзбекистонда олий таълим тизимини ривожлантиришга катта эътибор қаратилмоқда. Президент Шавкат Мирзиёев раҳбарлиги остида ишлаб чиқилган Ўзбекистоннинг 2017-2021 йиллар учун ҳаракатлар стратегиясида белгиланган вазифалардан келиб чиқиб, биз олий таълим сифатини таъминлашга ва халқаро таълим майдонида рақобатбардошликка эришишга алоҳида эътибор қаратяпмиз. Ўзбекистонни Марказий Осиё таълим хабига айлантириш мақсадларида жорий йилнинг бошида бизнинг олий таълим муассасаларимиз энг йирик Elsevier халқаро илмий компанияси билан “Илм-фан 2020” дастурини амалга оширишга киришди”, - дейди у.
Азиз Абдуҳакимовнинг сўзларига кўра, мазкур дастурни амалга ошириш доирасида Фанлар Академиясининг барча илмий-тадқиқот институтлари учун миллий обуна ташкил этилган, Scopus халқаро маълумотлар базасининг илмий ва таълим ресурсларига кириш имкони таъминланган. Республика ОТМларида QS (Quacquarelli Symonds) ва Times Higher Education (THE) агентликлари билан ҳамкорликда семинарлар ўтказилган. Маҳаллий олийгоҳларнинг халқаро рейтингларга кириши билан боғлиқ асосий масалалар муҳокама этилган. Шунингдек агентликларнинг рейтинглар методологияси ўрганилиб, керакли тавсиялар берилган.
“Айни дамда биз халқаро агентликлар билан ҳамкорликда Йўл харитаси устида иш олиб боряпмиз, бу бизга яқин йилларда Ўзбекистондаги олийгоҳларнинг халқаро рейтингларга қўшилиш имконини беради. Бугун биз жуда муҳим тадбирдамиз. Юртимизнинг энг яхши кўрсаткичларни қайд этган етук олимларини тақдирлаш маросимини ҳар йили ўтказишни кўзлаганмиз. Шубҳасиз, ушбу форум олимларимизнинг янада фаоллашуви учун яхши мотивация беради”, - деди Бош вазир ўринбосари.
Шундан сўнг Президент маслаҳатчиси Абдужаббор Абдувоҳидов, Бош вазир ўринбосари Азиз Абдуҳакимов, Олий ва ўрта махсус таълим вазири Ином Мажидов, Elsevier’нинг Туркия, Эрон, Яқин Шарқ ва Марказий Осиё мамлакатлари бўйича бошқарувчи директори Тайфун Башал, Elsevier Central Asia минтақавий директори Алия Оспанова ва “5-100 лойиҳаси” лойиҳавий офиси раҳбари Надежда Полихина Ўзбекистоннинг энг яхши олимларини тақдирлашди.
Фанлар Академияси олими Темурбек Усмонов, Ўзбекистон Миллий университетидан Бобомурод Аҳмедов, Турин политехника университетидан Дилшод Тўлагановлар “Йилнинг энг яхши олимлари” сифатида эътироф этилди.
