Канадада ҳибсга олинган Huawei директори соғлиғи ёмонлашгани сабабли озод қилинишини сўради

Канадада ҳибсга олинган, Huawei компанияси молиявий директори Мэн Ваньчжоу айбсизлигини айтмоқда ва гаров пули эвазига озодликка чиқарилишини сўрамоқда. Reuters ахборот агентлигининг хабар беришича, Мэн Ваньчжоу ҳибсга олингандан кейин соғлиғи ёмонлашган ва шу сабабли қон босими ошиши хуружи билан шифохонага ҳам тушган. 

Мэн Ваньчжоу 1 декабрда АҚШ сўрови билан Канаданинг Ванкувер шаҳрида ҳибсга олинганди.

Аввалроқ Хитой ташқи ишлар вазирлиги АҚШнинг Хитойдаги элчиси Терри Бранстедни чақиртириб, Мэн Ваньчжоунинг ҳибсга олиниши юзасидан қатъий норозилик билдирган. Хитой томони АҚШ аёлнинг Канадада ҳибсга олинишига “асоссиз сўров” бергани ва шу сабабли уни бекор қилиши кераклигини айтган.

Мэн HSBC банки орқали ноқонуний транзакциялар содир этганликда гумон қилинмоқда. Банк эса АҚШ санкциялари остига тушган Эрон, Судан ва Ливияга пул ўтказмалари амалга оширганликда айбланмоқда.