Қирғизистоннинг Россиядаги янги элчиси Аликбек Жекшенкулов мамлакат жанубида Россияга қарашли иккинчи ҳарбий базанинг эҳтимолий очилиши ҳақидаги саволга жавоб берди. Бу ҳақда ТАСС хабар қилмоқда.
Фото: Дмитрий Серебряков/ТАСС
Унинг сўзларига кўра, Кантдаги мавжуд авиабаза бутун Марказий Осиё учун муҳим барқарорлаштирувчи омил ҳисобланади. Бишкек эса уни кучайтириш бўйича таклифни қўллаб-қувватлаяпти. Шу билан бирга, яна бир базанинг очилиш эҳтимоли истисно этилмаяпти.
«Шунинг учун, менимча, бу масала икки мамлакат президентларининг март ойида бўлиб ўтадиган учрашувида муҳокама қилиниши мумкин», - деди Жекшенкулов.
Унинг таъкидлашича, Фарғона водийсининг ўзига хос хусусиятларини ҳам эътиборга олиш керак, Қирғизистоннинг жануби унинг бир қисми саналади. Қайд этилишича, бу ерда ижтимоий-иқтисодий ва демографик хусусиятга эга қатор долзарб масалалар мавжуд.
Эслатиб ўтамиз, аввалроқ Россия ташқи ишлар вазири Сергей Лавров 3-4 февраль кунлари расмий ташриф билан Бишкекда бўлиши хабар қилинганди.
