Ҳиндистон ва Покистон Кашмирда бир-бирини ўққа тутди

Фото: Mukesh Gupta/Reuters

Ҳиндистон Мудофаа вазирлиги вакили подполковник Девендер Ананднинг маълум қилишича, Ҳиндистон ва Покистон ҳарбийлари Кашмирда яна бир-бирига қарата ўт очган. Бу ҳақда РИА «Новости» хабар бермоқда.

Унинг айтишича, Покистон армияси кеча тунда ўт очди.

«Покистон армияси ҳеч қандай сабабсиз ўт очмаслик тўғрисидаги режимни бузиб, Акнур секторини ўққа тутди», - дея таъкидлаб ўтган Ананд.

Шунингдек, унинг қўшимча қилишича, ҳиндистонлик ҳарбийлар ҳам бунга жавобан ўт очишган.

«Соат тахминан 06:30 (Тошкент вақти билан соат 06:00)да отишма тўхтади», - дея қайд этиб ўтди Ананд.

Ананд икки мамлакат ҳарбийлари ўртасидаги отишма оқибатида ҳалок бўлганлар тўғрисидаги маълумотга аниқлик киритмади.

Эслатиб ўтамиз, аввалроқ Ҳиндистон Покистон билан зиддиятга воситачилар жалб этилишига қарши чиққанди.

Тайёрлаган Отабек Матназаров

#Ҳиндистон #Покистон

14 февраль куни Покистон ҳудудида ўрнашган «Жайш-э-Муҳаммад» террорчи гуруҳи Кашмирда Ҳиндистон армияси ҳарбийлари колоннаси ўтаётган йўлда теракт содир этиши натижасида 46 нафар ҳинд ҳарбийси ҳалок бўлди. Бу воқеа ортидан Покистон ва Ҳиндистон муносабатларида можаро яна авж олди.