Инвесторларга янги меҳмонхонани қуриш ва жиҳозлаш учун давлат бюджетидан субсидиялар ажратилади
|21:44 / 06.03.20194 0688 мин
Фото: ShutterstockФото: Shutterstock
Норматив-ҳуқуқий ҳужжатлар лойиҳалари муҳокамаси порталида Вазирлар Маҳкамасининг “Янги меҳмонхонани қуриш ва жиҳозлаш учун инвесторларга субсидия ажратиш ҳамда ташкилотларни франчайзинг тўғрисидаги шартнома асосида қисман молиялаштириш учун Давлат бюджетидан маблағ ажратиш тартиби тўғрисидаги низомни тасдиқлаш тўғрисида”ги қарори лойиҳаси жойлаштирилди.
Низомга кўра, инвесторлар томонидан меҳмонхона тоифаси тасдиқлангач янги меҳмонхонани қуриш ва жиҳозлаш учун инвесторлар харажатларининг бир қисми субсидия ҳисобидан қопланади.
Бунда субсидия ажратиш учун меҳмонхона 2022 йил 1 январгача фойдаланишга топширилган бўлиши лозим.
Инвесторлар харажатларининг бир қисмини Давлат бюджетидан молиялаштириш миқдори низом кучга кирган вақтдан бошлаб қўшимча равишда янгидан ташкил этилаётган меҳмонхона хоналари сони 50 мингтага етгунига қадар амал қилади. Ўзбекистон Республикаси Туризмни ривожлантириш давлат қўмитаси ҳар чорак якуни билан қўшимча равишда янгидан ташкил этилаётган меҳмонхона хоналари ҳисобини юритади ва Молия вазирлигига тақдим этади.
Инвесторлар ва ташкилотлар Давлат бюджетидан субсидия олиши ёки қисман молиялаштирилиши учун қуйидаги талабларга жавоб бериши шарт:
Ўзбекистон Республикаси Солиқ кодексида назарда тутилган солиқ ва бошқа мажбурий тўловлар бўйича қарзи бўлмаган;
қайта ташкил қилиш, банкротлик ва тугатиш жараёнида бўлмаган;
Давлат бюджетидан меъёрий-ҳуқуқий ҳужжатлар асосида молиявий таъминот ва харажатларни қоплаш мақсадларига маблағ жалб қилмаган.
Субсидиялар инвесторларга янгидан қурилган меҳмонхона қуйидаги талабларга жавоб берганда ажратилади:
камида 3 юлдузли тоифа учун 50 та хонадан кам бўлмаган хоналар фондига эга меҳмонхона;
камида 4 юлдузли тоифа учун 100 та хонадан кам бўлмаган хоналар фондига эга меҳмонхона.
Субсидиялар Қўмита томонидан меҳмонхона тоифаси тасдиқлангач қуйидаги миқдорларда бир маротаба:
камида 3 юлдузли тоифа ҳамда 50 ва ундан кўп хоналарга эга меҳмонхоналардаги ҳар бир хона учун 40 миллион сўм;
камида 4 юлдузли тоифага ҳамда 100 ва ундан кўп хоналар эга меҳмонхоналардаги ҳар бир хона учун 65 миллион сўмдан ажратилади.
Мавзуга оид
Келгуси йил учун Давлат бюджети параметрларини тасдиқлаш жараёнида юқоридаги миқдорлар ҳар йили индексация қилган ҳолда амалга оширилади.
Инвесторлар субсидиялар ажратилиши учун Қўмитага белгиланган тартибда ариза билан мурожаат қилади.
Аризага қуйидаги ҳужжатлар илова қилинади:
ариза берувчининг – юридик шахс бўлган инвесторнинг номи, жойлашган ери (почта манзили), СТИР ва тижорат банкидаги ҳисобрақамлар реквизитлари;
янги қурилган меҳмонхонанинг кадастр ҳужжатларининг нусхаси;
қўмита ҳузуридаги “Туризм хизматларини сертификатлаш маркази” ДУК томонидан тақдим этилган мувофиқлик сертификати ҳамда янги қурилган меҳмонхонанинг 3 ёки 4 юлдузли меҳмонхона тоифасини тасдиқловчи ҳужжатнинг нусхалари.
Меҳмонхонага тоифа беришда мувофиқликни баҳолаш жараёнига хизматлар соҳасидаги хорижий “Катта тўртлик” компаниялари ёки уларнинг мутахассисларини жалб этиш сертификатлаштиришнинг мажбурий шарти ҳисобланади.
Хорижий компания ёки унинг Ўзбекистон Республикасидаги ваколатхонасини жалб этиш орқали баҳолашни ташкил этиш ва ўтказиш бўйича қўшимча харажатлар сертификатлаштириш шартномасига киритилади.
Хорижий компания ёки унинг Ўзбекистон Республикасидаги ваколатхонасини жалб этиш қўмита қарори билан амалга оширилади.
Қўмита ариза келиб тушган кундан бошлаб, ўн кун муддатда унинг низомда белгиланган талабларга мослигини ўрганиб чиқади ҳамда аризани қаноатлантириш ёки уни рад этиш тўғрисида қарор қабул қилади.
Қўмита томонидан аризани ўрганиб чиқишда қўшимча ҳужжатларни сўраб олиш ёки қўшимча ўрганишлар ўтказиш талаб этилса, аризани ўрганиб чиқиш бир ойгача бўлган муддатда амалга оширилади.
Қўмита ариза берувчини субсидиялар ажратиш ёки аризани рад этиш тўғрисида асослантирилган ҳолда ёзма шаклда, шу жумладан электрон ахборот тизими орқали хабардор қилади.
Ариза рад этилган ҳолларда инвестор қўмитага аризани қайта кўриб чиқиш учун такроран мурожаат қилиши мумкин. Ариза такроран тақдим этилган кундан бошлаб беш кун мобайнида қўмита томонидан қайта кўриб чиқилади.
Аризаси қаноатлантирилган инвесторга субсидиялар ажратиш қўмитанинг тегишли буйруғи асосида амалга оширилади. Ушбу буйруқда субсидия миқдори, ажратиш даври, меҳмонхона номи, юлдуз тоифаси ва хоналар фонди, манзили ва унинг кадастр рақами, субсидия олаётган инвестор - юридик шахс номи ва СТИР рақами, тижорат банкдаги ҳисоб рақами кўрсатилади. Мазкур буйруқ нусхаси уч кун муддатда қўмита томонидан Ўзбекистон Республикаси Молия вазирлигига етказилиши таъминланади.
Ташкилотлар учун дунёнинг таниқли ва нуфузли меҳмонхона брендларидан фойдаланиш бўйича роялти франчайзинг тўғрисидаги шартнома кучга кирган вақтдан бошлаб уч йил мобайнида Давлат бюджети маблағлари ҳисобидан қисман молиялаштирилади.
Давлат бюджети маблағлари ҳисобидан франчайзинг тўғрисидаги шартнома бўйича қисман молиялаштириш қуйидаги талабларга жавоб берганда амалга оширилади:
дастлабки 50 та 3 юлдузли тоифага эга меҳмонхона — ҳар бир меҳмонхонанинг битта хонаси учун йиллик 200 АҚШ доллари эквивалентида;
дастлабки 30 та 4 юлдузли тоифага эга меҳмонхона — ҳар бир меҳмонхонанинг битта хонаси учун йиллик 400 АҚШ доллари эквивалентида.
Дунёнинг таниқли ва нуфузли меҳмонхона брендларидан (“Brand Finance” ёки қўмита томонидан белгиланган бошқа рейтинг агентлигига мувофиқ меҳмонхоналар рўйхати бўйича топ-50 рейтингига кўра) фойдаланиш бўйича тадбиркорлик субъектлари учун роялти кучга кирган вақтдан бошлаб уч йил мобайнида Давлат бюджети маблағлари ҳисобидан қисман молиялаштирилади.
Бунда ташкилотлар учун роялтини қисман молиялаштиришнинг умумий ҳажми кўпи билан 10 миллион АҚШ доллари эквивалентига тенг бўлади.
Ташкилотлар Давлат бюджети маблағлари ҳисобидан қисман молиялаштириш учун қўмитага белгиланган тартибда ариза билан мурожаат қилади.
Аризага қуйидагилар илова қилинади:
ариза берувчининг – юридик шахс бўлган Ўзбекистон Республикаси резидентининг номи, жойлашган ери (почта манзили) ва СТИР рақами ва тижорат банкидаги ҳисобрақамлар реквизитлари;
ташкилотлар ҳамда таниқли ва нуфузли меҳмонхона брендлари билан франчайзинг тўғрисида тузилган шартнома нусхаси;
меҳмонхона хизматини кўрсатиш бўйича сертификат нусхаси.
Қўмита ариза келиб тушган кундан бошлаб, ўн кун мобайнида унинг низомда белгиланган талабларга мослигини ўрганиб чиқади ва аризани қаноатлантириш ёки уни рад этиш тўғрисида қарор қабул қилади.
Қўмита томонидан аризани ўрганиб чиқишда қўшимча ҳужжатларни сўраб олиш ёки қўшимча ўрганишлар ўтказиш талаб этилса, аризани ўрганиб чиқиш бир ойгача бўлган муддатда амалга оширилади.
Қўмита ариза берувчини қисман молиялаштириш ёки аризани рад этиш тўғрисида асослантирилган ҳолда ёзма шаклда, шу жумладан, электрон ахборот тизими орқали хабардор қилади.
Ариза рад этилгандан ҳолларда ташкилотлар қўмитага аризани қайта кўриб чиқиш учун киритишлари мумкин. Ариза такроран тақдим этилган кундан бошлаб беш кун мобайнида қўмита томонидан қайта кўриб чиқилади.
Ташкилотларга Давлат бюджети маблағлари ҳисобидан қисман молиялаштириш қўмитанинг тегишли буйруғи асосида амалга оширилади. Ушбу буйруқда молиялаштириш миқдори, ажратиш даври, меҳмонхона номи, юлдуз тоифаси ва хоналар фонди, манзили ва унинг кадастр рақами, молиялаштириш миқдорини олаётган ташкилот - юридик шахс номи ва СТИР рақами, тижорат банкдаги ҳисоб рақами кўрсатилади. Мазкур буйруқ нусхаси уч кун муддатда қўмита томонидан Ўзбекистон Республикаси Молия вазирлигига етказилиши таъминланади.
