Навоий шаҳридаги маданият мактаби ётоқхонасида ўқувчилар калтакланиши юзасидан расмий маълумот берилди

Мазкур ҳолат юзасидан Навоий шаҳар ИИО ФМБ томонидан терговга қадар текширув ҳаракатлари олиб борилган. 

Терговга қадар текширув ҳаракатлари давомида тан жароҳати олган ўқувчиларнинг танасида тан жароҳати бор-йўқлигини аниқлаш мақсадида судга оид тиббий экспертиза тайинланган.

Экспертиза хулосасига кўра, орадан вақт ўтиб кетгани учун Муҳаммедов Миржалол Анваржон ўғли, Одилов Дилшод Ғайрат ўғли, Эшмуродов Қувондиқ Мурод ўғли, Юсупов Исломбек Илхомбек ўғли, Абдуллаев Жавоҳир Носиржон ўғли, Муҳаммадов Шерзод Шухратович, Самадов Толибжон Илхомович, Неъматов Шерзод Қосим ўғли, Ҳамидов Ахрор Олимжон ўғли, Тотлиев Ҳикматулло, Ҳамраев Наврўз Жаббор ўғли, Хожиқурбонов Санъат, Исомиддинов Сайфулло Собир ўғли ва Бобоқулов Тоштурди Қурбон ўғлининг бирортасида тан жароҳатлари борлиги аниқланмаган.

Шунингдек, мактабда содир этилган ҳолатни муҳокама қилиш мақсадида Навоий шаҳри ҳокими М.Базаров иштирокида йиғилиш ўтказилган. Унда Навоий шаҳри прокурори И.Расулов, шаҳар ИИО ФМБ бошлиғи Ф.Сидиқов, ўринбосарлари А.Ойдинов, З.Рамазонов ҳамда бошқа тегишли мутасадди ташкилот вакиллари иштирок этган.

Йиғилиш давомида калтакланган М.Муҳаммедов, Д.Одилов, Қ.Эшмуродов, И.Юсупов, Ж.Абдуллаев, Ш.Муҳаммадов, Т.Самадов, Ш.Неъматов, А.Ҳамидов, Ҳ.Тотлиев, Н.Ҳамраев, С.Хожиқурбонов, С.Исомиддинов ва Т.Бобоқулов уларни калтаклаган 3-босқич ўқувчилари А.Сувонов, Ш.Абдувохидов ҳамда Х.Холиқов билан яраштирилиб, улар томонидан содир этилган ушбу ҳолат мактаб ўқувчи ва ўқитувчилари орасида муҳокама қилиниб, келгусида бундай ҳолат содир этилмаслиги учун тегишли чора-тадбирлар белгилаб олинган. 

Йиғилиш якунида мазкур ҳолат содир этилишига сабабчи бўлган ва ҳолатни яширгани учун мактаб директорининг маънавият ва маърифат ишлари бўйича ўринбосари Г.Ҳасанова, ўқувчи ёшлар уйи коменданти Ф.Жабборов, тарбиячиси С.Қўчқоров эгаллаб турган лавозимидан озод қилинган, мактабнинг «Ёшлар етакчиси» Ф.Ашуров ва мактаб психологи Ш.Ҳақбердиевага «ҳайфсан» интизомий жазо чоралари қўлланилган.

Терговга қадар текширув ҳаракатлари давомида фуқаролар А.Сувонов, Ҳ.Холиқов ҳамда Ш.Абдувоҳидовнинг ҳаракатларида Ўзбекистон Республикаси МЖтКнинг 183-моддасида кўрсатилган майда безорилик ҳуқуқбузарлиги аломатлари бўлгани сабабли, тўпланган ҳужжатлар Навоий шаҳар ИИО ФМБ 3-сонли ИИБ ҳузуридаги ТГ суриштирувчиси лейтенант А.Истамов томонидан 22.02.2019 йилдаги 18/145-сонли чиқиш рақами билан Маъмурий ишлар бўйича Навоий шаҳар судига юборилган.

Мазкур ҳолат 2019 йил 23 февраль куни Маъмурий ишлар бўйича Навоий шаҳар суди томонидан мактабнинг ўзида ҳуқуқбузарлар ва уларнинг  ота-оналари иштирокида сайёр суд мажлисида кўриб чиқилиб, ҳуқуқбузарлар А.Сувонов, Ш.Абдувохидов ва Х.Холиқов майда безорилик ҳаракатини содир қилгани сабабли уларнинг ҳар бирига энг кам ойлик иш ҳақининг бир баравари миқдорида жарима жазоси тайинланган», – дейилади маълумотда.