Урганчда Жалолиддин Мангуберди хиёбони ташкил этилади

Вазирлар Маҳкамаси Хоразм вилоятининг Урганч шаҳрида Жалолиддин Мангуберди хиёбонини ташкил этиш ва унинг янги ҳайкалини ўрнатиш, ёдгорлик билан бутунжаҳон сайёҳларини кенг таништириш ва улар учун қулай шарт-шароитлар яратиш, шунингдек, хиёбон ҳудудини анъанавий қурилиш услуби билан уйғунлаштирилган ҳолда барпо этиш ҳамда аҳоли турмуш даражасини янада яхшилаш мақсадида фармойиш қабул қилди.

Ҳужжат билан Хоразм вилояти ҳокимлиги, Ўзбекистон Республикаси Қурилиш вазирлиги ҳамда Ўзбекистон Бадиий академиясининг Хоразм вилояти Урганч шаҳрининг Ал-Хоразмий, Паҳлавон Маҳмуд, Шерозий ва Ўзбекистон кўчалари оралиғида Жалолиддин Мангуберди хиёбонини ташкил этиш ва унинг янги ҳайкалини ўрнатиш тўғрисидаги таклифи маъқулланди.

Белгилаб қўйилишича, лойиҳа доирасида:

Жалолиддин Мангуберди ҳайкалини яратиш, унга тегишли лойиҳа-смета ҳужжатларини ишлаб чиқиш ва уларни экспертизадан ўтказиш билан боғлиқ харажатлар 2019 йил учун Ўзбекистон Бадиий академиясига ажратилган маблағлар ҳисобидан;

Жалолиддин Мангуберди хиёбонини ташкил қилиш, ҳайкал постаментини яратиш, ободонлаштириш ва кўкаламзорлаштириш, ташқи ёритиш тизимлари, ичимлик ва оқова сув тармоқларини модернизация қилиш, шунингдек, ҳудуднинг суғориш тизимларини яхшилаш ва ер ости сувлари сатҳини пасайтириш ишлари билан боғлиқ харажатлар Хоразм вилояти маҳаллий бюджетининг қўшимча манбалари ҳисобидан;

электр энергияси, табиий газ ва алоқа тармоқларини қуриш, реконструкция қилиш, таъмирлаш ва кўчириш ишлари тегишлигига кўра “Ўзбекэнерго” АЖ, “Ўзтрансгаз” АЖ ва “Ўзбектелеком” АКнинг ўз маблағлари ҳисобидан;

хиёбон ҳудудида Жалолиддин Мангубердининг янги ҳайкалини яратиш ва ўрнатиш ишлари натижасида бузиладиган турар жойлар учун компенсация тўловлари Ўзбекистон Республикаси Вазирлар Маҳкамасининг 2006 йил 29 майдаги 97-сон қарори билан тасдиқланган Давлат ва жамоат эҳтиёжлари учун ер участкаларининг олиб қўйилиши муносабати билан фуқароларга ва юридик шахсларга етказилган зарарларни қоплаш тартиби кўрсатилган тартибда амалга оширилади.

Шунингдек, мазкур бандда назарда тутилган ишлар ҳомийлик хайриялари ва қонунчиликда тақиқланмаган бошқа манбалар ҳисобидан амалга оширилади.

Хоразм вилояти Урганч шаҳрининг марказий қисмидаги Ал-Хоразмий, Паҳлавон Маҳмуд, Шерозий ва Ўзбекистон кўчалари оралиғида барпо этилаётган Жалолиддин Мангуберди хиёбонининг йўл-транспорт ва муҳандислик-коммуникация тармоқларини модернизация қилиш бўйича тадбирлар режаси тасдиқланди. 

Ўзбекистон Республикаси Қурилиш вазирлиги Хоразм вилояти ҳокимлиги билан биргаликда 2019 йилнинг 1 апрелига кадар лойиҳани Жалолиддин Мангуберди яшаб ўтган давр тарихига уйғунлаштирган ҳолда таклифларни танлов асосида ва хорижий давлатлардан малакали мутахассисларнинг иштирокини таъминлаган ҳолда ишлаб чиқади ҳамда лойиҳа ишларининг амалга оширилиши мониторингини олиб боради. Бунда Жалолиддин Мангуберди ҳайкалини яратиш, унга тегишли лойиҳа-смета ҳужжатларини ишлаб чиқиш ва уларни экспертизадан ўтказиш билан боғлиқ ишлар Ўзбекистон Бадиий академияси томонидан амалга оширилади.