Колумбия президенти Мадуро ҳокимиятига барҳам бериш чақириғи билан чиқди

Колумбия президенти Иван Дуке Венесуэла президенти Николас Мадуро ҳукмронлигига чек қўйишга чақирди. У Associated Press (AP) агентлигига берган интервьюсида ана шундай фикр билдирди.

"Николас Мадуро ёвузлик борасида Слободан Милошевич билан тенг. Бунга чек қўйиш керак", - деди у.

Аввалроқ Венесуэла президенти Колумбия билан чегарада 10-28 сентябрь кунлари ҳарбий машғулотлар ўтказилишини эълон қилганди. 

Колумбия ташқи ишлар вазири Карлос Ольмес Трухильо EFE агентлигига берган интервьюсида мамлакат делегацияси БМТ бош ассамблеясининг 74-сессиясида Каракаснинг исёнчи ташкилотлар билан алоқадорлигини исботловчи далилларни тақдим этишини маълум қилди.