Францияда Жак Ширак вафоти муносабати билан мотам эълон қилинди  

Франция раҳбарияти собиқ президент Жак Ширак вафоти муносабати билан 30 сентябрни умуммиллий мотам куни деб эълон қилди. Шу куни Париждаги Сен-Сюльпис черковида мотам маросими бўлиб ўтади. 29 сентябргача одамлар Елисей саройида қўйилган мотам китобида ўз таъзияларини қолдиришлари мумкин бўлади.  

Жак Ширак 26 сентябрда 87 ёшида вафот этди. У 1995-2007 йиллар давомида Франция президенти бўлган. Бунгача Ширак қишлоқ хўжалиги вазири, бош вазир ва Париж мэри сифатида фаолият юритган. Охирги 3 йил у расмий маросимларда иштирок этмаган. 

Мотам муносабати билан бутун Франция бўйлаб миллий байроқлар туширилиб, бир дақиқалик сукут ўтказилади.