Алишер Султонов Виктор Вексельберг билан музокаралар ўтказди

Ўзбекистон энергетика вазири Алишер Султонов «РЕНОВА» компаниялари гуруҳи директорлар кенгашининг раиси, «Сколково» Фонди директорлар кенгаши раиси Виктор Вексельберг бошчилигидаги Россия делегациясини қабул қилди.

Вазирлик матбуот хизматига кўра, делегация таркибидан «Хевел», «КомплексПром» АЖ, «РОТЕК» АЖ, «Группа Оргсинтез» АЖ, «Химпром» ОТАЖ, «Цифра» МЧЖ компаниялари гуруҳи раҳбарияти ҳам жой олган.

Музокаралар давомида «Рақамли конлар» платформаси негизида углеводородларни ўзлаштириш самарадорлигини ошириш бўйича миллий марказ яратиш, Ўзбекистонда қайта тикланувчи ва муқобил энергия соҳасида ҳамда зарур технологияларни етказиб бериш каби йўналишларда ҳамкорлик қилиш истиқболлари муҳокама қилинди.

«РЕНОВА» компаниялари гуруҳи ўрнатилган қуввати 14 ГВт.га тенг Россиядаги йирик хусусий электр энергияси ишлаб чиқарувчи бўлиб, мамлакатнинг 20 та ҳудудида фаолият кўрсатади. Мазкур компания Россияда электр энергетикасини қайта қуриш ва бозорни шакллантиришнинг барча босқичларини босиб ўтди, шу боисдан Россия томони тажриба алмашиш, шунингдек, Ўзбекистондаги лойиҳаларда иштирок этиш, қуёш электр станциялари қуриш бўйича ўтказилаётган тендерларда қатнашиш, қолаверса, Ўзбекистонда қуёш батареяларини биргаликда ишлаб чиқаришни ташкил этиш, кейинчалик республикада амалга оширилаётган лойиҳаларда улардан фойдаланиш имкониятларини кўриб чиқишни таклиф этди.

Энергетика вазирлиги мамлакатнинг энергетика соҳасида амалга оширилаётган ислоҳотлар ва халқаро маслаҳатчилар билан ҳамкорликда тайёрланган соҳани ривожлантириш концепцияси тўғрисида маълумот берди ва табиий газни чуқур қайта ишлашга ва юқори қўшимча қийматга эга маҳсулотлар билан ишлаб чиқаришни диверсификациялашга, хусусан, тўқимачилик саноати учун полимер ва синтетик толалар ишлаб чиқаришни ташкил этишга қизиқиш билдирди. 

Россия томони ўз технологиялари ва ишлаб чиқариш жараёнлари билан бевосита жойида танишиш учун Ўзбекистонлик мутахассисларни Россия Федерациясига таклиф этиб, шу муносабат билан қўшма ишчи гуруҳи тузиш ва юқорида таъкидланган соҳаларда Россия компанияларининг тажрибаси билан танишиш ва уларни ўрганиш учун тегишли объектларга ташриф буюриш ташаббусини илгари сурди.

Иброҳим Абдураҳмонов «Сколково» директорлар кенгаши раиси, миллиардер Виктор Вексельберг билан учрашди