Фарғона шаҳридаги оилавий поликлиникада тиббиёт ходимларига тажовуз қилганларга нисбатан жиноят иши қўзғатилди.
«Суд-тиббий экспертиза бюросининг жорий йил 29 январдаги 340-сонли хулосасига кўра, ҳамшира М.Маъмуровада бурун суягининг ёпиқ синиши, бош мия чайқалиши, бўйин соҳасида шилинма, ўнг кўз-қовоқларида қонталаш каби тан жароҳатлари аниқланган.
Фарғона шаҳар ички ишлар органлари фаолиятини мувофиқлаштириш бошқармаси маълумотларига қараганда, мазкур ҳолат юзасидан фуқаро У.А.нинг ҳаракатларида Ўзбекистон Республикаси Жиноят кодексининг 109-моддаси 2-қисмида кўрсатилган қасддан баданга енгил тан жароҳати етказиш жинояти аломатлари мавжудлиги сабабли, унга нисбатан ушбу модда билан жиноят иши қўзғатилиб, суриштирув ишлари олиб борилмоқда», дейилади Соғлиқни сақлаш вазирлиги Жамоатчилик билан алоқалар бўлими хабарида.
28 январь куни Фарғона шаҳридаги 2-оилавий поликлиникада бемор ва унинг онаси тиббиёт ходимлари Машҳура Тожиматова ва Матлюба Маъмуровага тан жароҳати етказишгани, поликлиника маъмурияти дарҳол тез тиббий ёрдам бўлимига, воқеа ҳақида профилактика инспекторига хабар беришгани ҳақида хабар берилганди.
