Тошкент инвестиция форумига хорижлик 4 минг тадбиркор таклиф этилган – Ботир Усмонов

Тошкентда бўлиб ўтадиган халқаро инвестиция форумига 4 мингдан ортиқ хорижлик салоҳиятли инвестор ва тадбиркорлар жалб этилади. Бу ҳақда Иқтисодиёт ва саноат вазири ўринбосари Ботир Усмонов ХПКнинг навбатдаги сессиясида маълум қилди.

«Шу йилнинг 5-6 март кунлари Тошкентда халқаро инвестиция форумини ўтказишга катта тайёргарлик кўрилмоқда. Мазкур анжуманга хорижнинг 4 мингдан ортиқ салоҳиятли инвестор ва тадбиркорларини таклиф этганмиз. Бундан ташқари, 400дан ортиқ компаниялар раҳбарларига ҳам таклифномалар юборилган», - дея Ботир Усмоновнинг сўзларини келтирмоқда Kun.uz мухбири. 

Унинг фикрича, форум Ўзбекистонга хорижий инвестиция олиб киришни жадаллаштиришга ёрдам беради. 

Давлат активларини бошқариш агентлиги раисининг ўринбосари в.б. Тўлқин Набиевнинг маълум қилишича, 3000га яқин давлат корхоналарида давлат улуши қолдирилиши масаласи бугунги кунда ўрганиб чиқилмоқда. Яқин 2-3 ойда корхоналар самарадорлиги таҳлил қилинмоқда.

«Ҳозирда, давлат улуши бор корхоналар фаолияти, иқтисодий самарадорлиги таҳлил қилинмоқда. Ушбу ўрганишлар натижасида 3 минг атрофидаги давлат улуши бор корхоналарнинг қайбири хусусийлаштирилиши, қайсиларида давлат улуши камайтирилишига доир қарор қабул қилинади. Шундан сўнг, хусусийлаштирилиши керак бўлган корхоналар тадбиркорларга сотилади. Бу масалалар яқин 2-3 ойда ҳал бўлади», - деди Тўлқин Набиев.