Термизда қўлбола усулда тайёрланган ўқотар қуролни сотмоқчи бўлган шахс ушланди

Сурхондарё вилоятида қўлбола усулда тайёрланган ўқотар қуролни сотмоқчи бўлган шахс ушланди

Фото: Тергов департаменти

2020 йил 31 январь куни Термиз шаҳри бўйича ИИО ФМБ ходимлари томонидан махсус тадбир ўтказилган. Бу ҳақда Ўзбекистон Республикаси ИИВ ҳузуридаги Тергов департаменти хабар бермоқда.

Тадбир жараёнида Термиз туманида яшовчи 39 ёшли Р.С. қўлбола усулда ўзи ясаган ўқотар қурол ва 12 дона патронни жами 1 750 000 сўм эвазига сотаётган вақтида ушланган ва ундан қурол ва патронлар ашёвий далил тариқасида расмийлаштириб олинган.

Экспертиза хулосасига кўра, олиб қўйилган қўлбола қурол ва патронлар жанговар ҳолатда отиш учун яроқли эканлиги кўрсатилган.

Мазкур ҳолат юзасидан Термиз шаҳри бўйича ИИО ФМБ 2-сонли ИИБ ҳузуридаги Тергов бўлими томонидан Ўзбекистон Республикаси Жиноят кодексининг 248-моддаси 3-қисми “а” банди билан жиноят иши қўзғатилиб, Р.С.,га нисбатан айблов эълон қилинган ва “қамоққа олиш” тарзидаги эҳтиёт чораси қўлланилган.

Дастлабки тергов ҳаракатлари олиб борилмоқда.

Тайёрлаган: Отабек Матназаров

#Термиз #қурол