Сув кўтарган кишилар: Олтиариқдаги маҳалланинг кўп йиллик муаммоси қачон ҳал этилади?

Кўчамизга тармоқ тортиш учун эса яна минг метр қувур керак. Ўша 700 метрлик қувурларни 2019 йилнинг апрель ойида туман «Сувоқова» ташкилоти олиб келган. Лекин сув тортиш ишлари бошланмаяпти. Кўп марта туман раҳбарларига учрадик. Улар ҳар сафар ваъда бергани-берган. Ёлғон ваъдалардан зерикдик. Охири сайтга мурожаат қилишимизга тўғри келди», дейди маҳалла оқсоқолларидан бири Абдулатиф Аҳмедов.

Маҳалладаги аёллар, ёш болалар узоқ масофадан хонадонларига турли идишларда сув ташиётгани кишининг раҳмини келтирарди.

Имконияти борлар эса халқ тилида «муравей» деб аталувчи мотоциклдан фойдаланади.

«Эркаклар ишга кетади. Узоқ жойдан сув ташиш ўзимизга қолади. Ҳовлимиздан чиқадиган зах сув ҳам бир кунда бир марта 1 соат вақт тушади, холос. Бу сув таркибини текширтиришганда ичишга яроқсиз бўлиб чиққан. Ариқдан оқаётган сув ҳам тоза эмас», дейди Тожихон Ҳотамова.

Бир йил олдин маҳалланинг эски гузари биносига олиб кириб қўйилган полиэтилен қувурлар узоқ муддат ишлатилмай турса, яроқсиз ҳолатга келиб қолиши мумкинлигини таъкидлашди.

Маориф кўчасидаги фуқаролар етарли узунликдаги қувурлар олиб келиниб, «Сувоқова» ташкилотидан бирор мутахассис келиб кавлаш, қазиш ва манбадан тортиш ишларига бош-қош бўлиб турса, маҳалла вакилларининг ўзлари ҳашар йўли билан тармоққа сув тортишларини айтишди.

Шуни айтиш керакки, маҳалла аҳли ўз вақтида бу масала бўйича кўп жойларга мурожаат қилган. 2015 йилги мурожаатга прокуратурадан келган жавоб хатида тоза ичимлик суви тармоғини тортиш 2016 йил давлат дастурига киритилиши ҳақида таклиф берилгани айтиб ўтилган.

Мавжуд муаммога изоҳ олиш учун Олтиариқ тумани ҳокимлигида ҳам бўлдик.

Туман ҳокимлигидаги навбатчилар бу масалада «Сувоқова» ташкилоти раҳбари батафсил маълумот беришини айтишди. Кейин ташкилот раҳбарига қўнғироқ қилиб, ҳокимият биносига келишни сўрашди.

«Сувоқова» раҳбари Асрорбек Эсажонов тез фурсатда ҳокимликка етиб келди.

«Маориф кўчасидаги муаммони ўрганиш юзасидан ўзим бир неча бор ўша жойга борганман. Маҳалла аҳли ҳашар уюштириши керак. Ўз вақтида маҳалладаги хонадонлардан бири сув минорадан тармоққа улаш учун кавлаш ишларига рухсат бермаган. Шу ҳолатда қолиб кетган. 10 кун олдин ҳам маҳалла раисига айни шу масала бўйича қўнғироқ қилганман», деди мутасадди.

Ҳокимлик биносига «Маориф» МФЙ раиси Шуҳратжон Юлдашев ҳам етиб келди.

«Муаммо ҳал бўлмаяпти. «Сувоқова» ўтган йили 700 метр узунликдаги 50 миллиметрли қувур бериб кетган. Ҳали кўмилгани йўқ. Мутахассислар келиб, «Яна диаметри 76 миллиметрли 500 метр узунликдаги қувур олиб бўлса, сўнг ҳашар қилиб кўмамиз», дейишди.

Маҳалла аҳли бепул кавлатиб беришни сўраяпти. Одамларимиз ўзи учун озгина шароит ҳам қилиш керак. Хуллас, 76 миллиметрли қувур бўлса, шу пайтгача иш юрган бўлар эди», дейишди. Уч-тўрт марта «Сувоқова»га мурожаат қилдим. Натижа бўлгани йўқ.  Ҳозирги кунда маҳаллий бюджетда маблағ йўқлиги учун иш юрмаяпти. Қурилиш фирмаси эса ҳеч бўлмаса, 10 фоизини ўтказиб бермаса иш бошламайди. Янги қурилган сув минораси тармоғига улаш учун яна 4,5 километр полиэтилен қувур бўлса, маҳалла 100 фоиз ичимлик суви билан таъминланади», дейди маҳалла раиси.

Туман марказидан бир километр масофада жойлашган «Маориф» маҳалласидаги ҳолат ечими қаерда? Наҳотки, ўтган йиллар давомида туман масъуллари тўрт мингдан зиёд аҳоли яшовчи ҳудуднинг ичимлик суви билан таъминланиши учун бош қотиришмаган? 

Умид қиламизки, мазкур кўчадаги ичимлик суви муаммоси юзасидан тегишли қарорлар қабул қилингач, маҳаллий бюджетдан маблағ ажратилиб, туман мутасаддилари тез кунларда муаммони ҳал этиш чораларини излаб топишади.

Сарварбек Назаров