Шанба куни Жанубий Кореяда коронавирусдан зарарланганлар сони кескин ўсди. Айни вақтда мамлакатда вирус юқтирганлар сони 3,5 мингга етган ва бу мамлакат беморлар сони бўйича Хитойдан кейинги иккинчи ўринда турибди. Ҳукумат вирусга қарши курашга армияни сафарбар қилган.
Ҳарбий хизматчилар мамлакат жануби-шарқидаги Тэгу шаҳрини дезинфекция қилиш ишларини амалга оширишмоқда, ушбу шаҳар мамлакатдаги вирус тарқалиши ўчоғи бўлганди. Ҳукумат «Синчхончжи» диний сектаси аъзоларини вирус тарқалиши манбаи деб ҳисобламоқда, улар мамлакатда вирус тарқала бошлаганидан кейин ҳам Тэгу оммавий маросимлар ўтказишган.
Жума куни Жаҳон соғлиқни сақлаш ташкилоти коронавируснинг глобал хавфини «жуда юқори» даражага кўтарганди. ЖССТ бош директори Тедрос Гебрейесес агар вирус тарқалиши олди олинса, эпидемия тўхтатилиши мумкинлигини таъкидлади. У касалликка қарши вакциналарнинг дастлабкилари бир неча ҳафта ичида чиқишини маълум қилди. «Дунёда 20дан ортиқ вакцина ишлаб чиқилмоқда ва бир қатор дориларнинг клиник тадқиқотлари олиб борилмоқда», деди у.
Папа уйдан чиқмаяпти, вирус бутун жаҳонни қамраши мумкин. Сўнгги маълумотлар
Жаҳондаги вазият
Яна кўплаб давлатлар ўз ҳудудида коронавирусдан зарарланишнинг илк ҳолатлари ҳақида маълум қилмоқда. Хитойнинг ўзида эса вирусдан зарарланиш ҳолатлари қайд этилиши ўсаётгани йўқ.
АҚШнинг ғарбий штатлари - Калифорния, Орегон ва Вашингтонда - вирусдан зарарланишнинг яна тўрт ҳолати қайд этилган, лекин бу беморлар бошқа давлатлардан келганлар билан алоқада бўлмаган.
ЖССТ маълумотига кўра, АҚШда коронавирусдан зарарланишнинг жами 62 ҳолати тасдиқланган.
Австралияда ҳам коронавирусдан илк ўлим ҳолати қайд этилди. Ундан «Даймонд принцесс» кемасида бўлган 78 ёшли эркак вафот этган. Эркак ва унинг 79 ёшли рафиқаси бир ҳафтача аввал коронавирус тарқалиши қайд этилган кемадан эвакуация қилинган.
Айни вақтда «яшил қитъа»да коронавирусга чалинган 25 киши аниқланган.
Бу орада Арманистонда коронавирусдан касалланган биринчи киши аниқланди. Мамлакат бош вазири Никол Пашинян Facebook’да маълум қилишича, бемор 28 февралда Эрондан рафиқаси билан келган 29 ёшли эркакдир.
