Канада коронавирусга қарши вакцинани синовдан ўтказишни бошлайди

Синовлар Долхаузи университетининг вакцинология марказида ўтказилади.

Фото: REUTERS

Канада соғлиқни сақлаш вазирлиги коронавирусга қарши вакцинани дастлабки синовдан ўтказишни маъқуллади. Бу ҳақда мамлакат бош вазири Жастин Трюдо маълум қилди.

"Канада соғлиқни сақлаш вазирлиги коронавирусга қарши салоҳиятли вакцинани дастлабки синовдан ўтказишни маъқуллади", - деди у.

Унинг сўзларига кўра, синовлар Долхаузи университетининг вакцинология марказида ўтказилади.

"Агар синовлар муваффақиятли ўтса, вакцинани ишлаб чиқарамиз ва мамлакатимизга тарқатамиз", - деб таъкидлади у.

Канадада бугунги кунда коронавирусга чалинганлар сони 75 мингдан ошган, 5,5 мингдан ортиқ киши вафот этган.

Аввалроқ америкалик олимлар коронавирусга даво топишганини маълум қилганди.

Тайёрлаган Дилшод Аскаров

#Канада #вакцина

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.