Tashkent Pharma Park кластери фаолиятини ташкил этиш чора-тадбирлари қабул қилинади

Вазирлар Маҳкамасининг “Tashkent Pharma Park инновацион илмий-ишлаб чиқариш фармацевтика кластерининг фаолиятини ташкил этиш ва молиялаштириш чора-тадбирлари тўғрисида”ги қарори лойиҳаси эълон қилинди.

“Tashkent Pharma Park инновацион илмий-ишлаб чиқариш фармацевтика кластерини ташкил этиш” лойиҳасини молиялаштириш учун Ўзбекистон Республикаси Тикланиш ва тараққиёт жамғармаси томонидан 50 миллион долларгача миқдордаги маблағлар 3 йил имтиёзли муддатни ўз ичига олган ҳолда 10 йил муддатга, йиллик 3 фоиз ставкада кредит берилади.

Ўзбекистон Республикаси Молия вазирлиги кўрсатилган маблағларни жалб қилишда тузиладиган кредит шартномаси бўйича Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлигининг Жамғарма олдидаги мажбуриятлари юзасидан белгиланган тартибда давлат кафолати беради.

Мазкур кредит маблағлари Фармацевтика тармоғини қўллаб-қувватлаш ва ривожлантириш жамғармаси, “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК маблағлари ва қонун ҳужжатларида тақиқланмаган бошқа маблағлар ҳисобидан сўндирилади.

Кредитнинг ҳисобини юритиш, уни қоплаш маблағларини йиғиш учун Молия вазирлиги Ғазначилигида махсус ҳисоб-рақам (сўмда ва АҚШ долларида) очилади.

Лойиҳани амалга ошириш учун Жамғарма ҳисобидан жалб этилган кредит маблағларини ўз вақтида қайтаришни таъминлаш мақсадида, истисно тариқасида норматив-ҳуқуқий ҳужжатлар Агентлик, унинг бўйсунувчи ташкилотлари ва Фармацевтика тармоғини қўллаб-қувватлаш ва ривожлантириш жамғармасига Вазирлар Маҳкамасининг 2020 йил 16 апрелдаги “2020 йил учун Ўзбекистон Республикаси Давлат бюджетининг барқарорлигини таъминлаш ва харажатларини мақбуллаштириш бўйича қўшимча чора-тадбирлар тўғрисида”ги 232-сон қарори 4-банди татбиқ этилмайди.

Кредитни сўндириш учун маблағлар жорий йилнинг 1 июлидан бошлаб ҳар 6 ой муддатда кредитни қоплаш махсус ҳисоб-рақамига ўтказилади.

Қуйидагилар:

“Tashkent Pharma Park инновацион илмий-ишлаб чиқариш фармацевтика кластерини ривожлантириш Дирекцияси” давлат муассасаси бошқарув ходимлари умумий чекланган сони 12 нафардан иборат бўлган тузилмаси;

“Tashkent Pharma Park инновацион илмий-ишлаб чиқариш фармацевтика кластерини ривожлантириш Дирекцияси” давлат муассасасининг раҳбар ходимлари ва мутахассислари меҳнатига ҳақ тўлашнинг Ягона тариф сеткаси бўйича разрядлари тасдиқланади.

Агентликка Tashkent Pharma Park инновацион илмий-ишлаб чиқариш фармацевтика кластери ҳудудида жойлаштирилган инвестиция лойиҳаларининг миқдори ва инвестициялар ҳажмига боғлиқ ҳолда Tashkent Pharma Park инновацион илмий-ишлаб чиқариш фармацевтика кластерини ривожлантириш Дирекциясининг бошқарув ходимларининг умумий чекланган сони ва ажратилган иш ҳақи фонди доирасида унинг тасдиқланган тузилмаси ва штат жадвалига ўзгартириш киритиш ҳуқуқи берилади.

Агентлик Фармацевтика тармоғини қўллаб-қувватлаш ва ривожлантириш жамғармаси маблағлари ҳисобидан Дирекцияга 3 дона автотранспорт воситалари, шу жумладан битта навбатчи автомобиль, битта шахсий ва юқори мартабали меҳмонлар учун битта юқори класс автомобиль сотиб олишга пул маблағлари ажратади.

Шунингдек, зарур ҳолларда Фармацевтика тармоғини қўллаб-қувватлаш ва ривожлантириш жамғармаси маблағлари ҳисобидан Tashkent Pharma Park инновацион илмий-ишлаб чиқариш фармацевтика кластерининг васийлик кенгашининг қарори асосида қўшимча автотранспорт воситалари сотиб олиши мумкин.

Кластер ҳудудида ташкил этиладиган лойиҳаларни халқаро стандартлар асосида сифатли ҳамда белгиланган муддатларда амалга оширилиши учун жалб этилган консалтинг ва инжиниринг хизматларини кўрсатишда иштирок этадиган мутахассислар ҳамда маслаҳатчиларнинг меҳнатига ҳақ тўлаш Фармацевтика тармоғини қўллаб-қувватлаш ва ривожлантириш жамғармаси маблағлари ҳисобидан амалга оширилади.

Агентлик, Ўзбекистон Республикаси Молия вазирлиги билан келишган ҳолда бир ойлик муддатда келгусида қўшимча молиялаштиришни ажратиш имконияти билан Ўзбекистон Республикаси Президентининг “Tashkent Pharma Park инновацион илмий-ишлаб чиқариш фармацевтика кластерини ташкил этиш тўғрисида” 2020 йил 28 январдаги ПҚ-4574-сон қарорида белгиланган биринчи навбатдаги тадбирларни тезкор бажариш учун Фармацевтика тармоғини қўллаб-қувватлаш ва ривожлантириш жамғармасидан Дирекция ҳисоб рақамига асослантирилган йиллик ҳисоб-китоблар бўйича аниқланган маблағларни ажратади.