Болалари билан харобада яшаётган жиззахлик аёлга қачон уй берилади? Бошланғич бадал тўланганига бир йил бўлмоқда

Жиззах вилояти Дўстлик туманидан Бахтигул Ҳамроева мурожаат қилиб, оиласи билан оғир шароитда яшаб келаётгани ва давлат томонидан қурилаётган арзон уй-жойлардан ололмаётгани ҳақида ёзганди. Биз ҳолатни ўрганиш мақсадида Дўстлик туманида бўлдик.

Очиғи, Бахтигул опа сизни ўзи излаб топмаса, у киши яшаётган жойни топа олмайсиз. Аёл қаровсиз, ўтган асрнинг минг битта асорати уриб турган Автойўл корхонасига тегишли хароба маконда 9 йилдан бери яшаб келяпти. Ўтган йили турмуш ўртоғи узоқ хасталикдан вафот этгач, вояга етмаган икки фарзанди билан қолган.

Б.Ҳамроева бизни ўзи яшаётган манзилга бошлади. Ҳозирги вақтда «Дўстлик дон маҳсулотлари» АЖда ишлаб, рўзғор тебратаётган экан.

Аёлнинг айтишича, у 2019 йилда ариза бериб, уй-жойга муҳтож оилалар учун қурилаётган уйлардан бирини 20 йил муддатга ипотека кредити асосида сотиб олмоқчи эканини билдиради. Туман ҳокимлиги бунга жавобан ариза «Оғир ижтимоий вазиятга тушиб қолган хотин-қизларга, ногиронлиги бўлган, кам таъминланган, фарзандларини тўлиқсиз оилада тарбиялаётган ва уй-жой шароитини яхшилашга муҳтож оналарга арзон уй-жойлар бериш тартиби тўғрисида»ги низом талабларига мос келиши, аммо 2019 йилда фойдаланишга топшириладиган уй-жойлар банд қилингани сабабли 2020 йилда қурилиши кўзда тутилган уй-жойларга талабгорлар рўйхатига киритилиши тушунтирилади.

Ўзи ишлаб турган корхона аёлга уйнинг бошланғич бадалини тўлаб беришга қарор қилади. 2019 йилнинг ноябрь ойида АТБ «Қишлоқ қурилиш банк»ка 13 500 000 сўм маблағ «Дўстлик дон маҳсулотлари» АЖ томонидан тўлаб берилади.

Аммо Вазирлар Маҳкамасининг юқорида тилга олинган 2018 йил 12 апрелдаги қарори асосидаги уйлар 2020 йилда Дўстлик туманида қурилмайдиган бўлади. Бу хабарни эшитган Бахтигул Ҳамроева яна умидсизликка тушади.

Масала шундаки, Б.Ҳамроевага туманда бирор киши сен фалон жойдан уй оласан, сенга аталган уй фалон жойдан қуриляпти, демайди ҳам. «Бирор киши менга тайинли жавоб бермагани учун турли жойларга мурожаат қилишга мажбур бўлдим», дейди у.

Дарҳақиқат, сенга уй берилади деб бошланғич тўлов қилдирилиши, бироқ унга ўша уй қаерда қурилаётганини маълум қилмаслик жуда тушунарсиз ҳолат. Бахтигул опанинг яшаб турган шароитини ҳисобга оладиган бўлсак, унинг хавотирланиши табиий, албатта.

Б.Ҳамроева яшаётган Саноатчилар маҳалласига туман ҳокимлиги мутасаддилари келишди. Маҳалла ва оилани қўллаб-қувватлаш бўлими бошлиғи Гулбаҳор Холмурадова Б.Ҳамроеванинг турмуш шароити, қандай вазиятда яшаб келаётгани билан бевосита таниш эканини айтди.

«Қўлимда жорий йилнинг 22 май куни туман ҳокими томонидан тасдиқланган баённома билан келдим. Унга кўра, Дўстлик туманидан 7 нафар қийин аҳволга тушиб қолган муҳтож оналарга арзон уйлар ажратилиши кўзда тутилган. Арзон уйларнинг бошланғич бадали Маҳалла ва оилани қўллаб-қувватлаш республика фонди томонидан тўлаб берилади. Ушбу ҳужжатга талабгорларни танлаш комиссиясининг барча аъзолари имзо қўйишган», – деди Г.Холмуродова.

Дўстлик тумани ҳокимининг соҳа бўйича ўринбосари Баҳром Бойқулов ҳақиқатан ҳам жорий йилда туманда арзон уй-жойлар қурилмаётганини тасдиқлади. Шу сабабли юқорида тилга олинган баённомага киритилган 7 нафар муҳтож аёлга Жиззах шаҳрида қурилаётган арзон уй-жойлардан ажратилиши режалаштирилибди.

Бу гаплар Бахтигул Ҳамроева гувоҳлигида айтилди. Дўстлик туманидан кўчиб кетса ҳам ўз уйи бўлишига розилик билдирди.

«Керак бўлса, Жиззах шаҳридан ўзимиз иш ҳам топиб берамиз», – деди Маҳалла ва оилани қўллаб-қувватлаш бўлими бошлиғи Гулбаҳор Холмурадова.

Шу билан масала ҳал бўлди, дейишимиз ҳам мумкин эди, албатта. Аммо Г.Холмуродова бизга тақдим этган баённома вилоят ишчи гуруҳига тавсия мазмунида. Қолаверса, мазкур ҳужжатда гарчи Бахтигул Ҳамроеванинг номи ҳам қайд этилган бўлса-да, баённоманинг қарор қисмида Гулбаҳор Холмурадова айтганидек, етти эмас, олти оила тавсия этилмоқда.

Кузатамиз, ушбу баённома муаммога ечим бўлармикан...

Исомиддин Пўлатов, Kun.uz мухбири.
Суратлар муаллифи – Жаҳонгир Алибоев.