Фарғона водийсида энергия муаммосини ўрганиш мақсадида Сенат ишчи гуруҳи тузилди

Ўзбекистон Республикаси Олий Мажлис Сенати томонидан Фарғона водийси вилоятларида табиий ва суюлтирилган газ, кўмир ҳамда электр энергияси билан таъминлаш ҳолатини ўрганиш бўйича ишчи гуруҳи тузилди.

Олий Мажлис Сенати раиси Танзила Норбоеванинг ижтимоий тармоқдаги саҳифасида Ўзбекистоннинг шарқий ҳудудларида энергия муаммоларини ўрганиш мақсадида ишчи гуруҳ тузилгани маълум қилинди.

Таъкидланишича, ишчи гуруҳ вилоятлардаги Монополияга қарши курашиш бошқармаларида соат 14.00дан 18.00га қадар қуйидаги жадвалга асосан қабулни ташкил этади:

• Наманган шаҳрида 27 ноябр куни;
• Андижон шаҳрида 28 ноябр куни;
• Фарғона шаҳрида 29 ноябр куни.

Эслатиб ўтамиз, 2019 йил 28 ноябр куни бош вазир Абдулла Арипов раҳбарлигида газ ва электр энергия билан боғлиқ муаммоларга бағишлаб ўтказилган видеоселектор йиғилишида ҳали қиш кирмасдан туриб, энергоресурслар таъминотида ўта жиддий муаммолар пайдо бўлгани кескин танқид қилинган, ҳукумат раҳбари буни «шармандали ҳолат», деб атаганди.

Жорий йилнинг 18 сентябр куни бўлиб ўтган видеоселектор йиғилишида бу йил қиш совуқ келиб, ҳаво ҳарорати олдинги йилларга нисбатан 2-5 даража паст бўлиши кутилаётгани таъкидланган, шу муносабат билан Вазирлар Маҳкамасига туман ва шаҳарлардаги ҳақиқий ҳолатдан келиб чиқиб, куз-қишга тайёргарлик юзасидан Тошкент шаҳрининг 12та тумани, Қорақалпоғистон ва ҳар бир вилоят бўйича алоҳида-алоҳида қарор қабул қилиш топширилган эди.

Президент Шавкат Мирзиёев томонидан бош вазир Абдулла Арипов Тошкент шаҳри туманларига, бош вазирнинг биринчи ўринбосари Очилбой Раматов вилоятларга шу масалалар бўйича масъул этиб бириктирилган, аҳолини ўз вақтида электр энергияси, газ, кўмир билан таъминлаш юзасидан алоҳида топшириқлар берилганди.

Бироқ ҳали қиш бошланмасдан туриб электр ва газ таъминотида муттасил узилишлар кузатила бошланди. Ижтимоий тармоқлар фойдаланувчиларнинг бу борадаги дард-у ҳасратларига тўлиб-тошди. Сенатнинг 20 ноябр куни бўлиб ўтган ялпи мажлисида сенат раиси Танзила Норбоева ҳам бу масалага эътибор қаратишга мажбур бўлганди.

25 ноябр куни ўтказилган матбуот анжуманида энергетика вазири Алишер Султонов куз-қиш мавсумига етарлича тайёргарлик кўрилганини таъкидлаган, свет ва газ таъминотидаги танқисликларни ноябр ойидагидек вазият олдин кузатилмагани билан изоҳлаган.

«2020 йилнинг ноябр ойидагидек вазият олдин кузатилмаган. Мана ўтган суткада истеъмол бўйича биз тарихий максимумга чиқдик – 213 млн киловатт/соат. Бу 17 фоиз ўсиш деганидир.

Биз нафақат совуқ тушгунича, балки ундан олдинроқ вазирлигимизда махсус штаб тузганмиз ва барча мутасаддилар мунтазам ишлашяпти. Барча ўринбосарларим ҳудудларда ишламоқда. Шахсан ўзим водий вилоятларига бориб келдим ва ҳокимлар билан кўмир масаласини муҳокама қилдим.

Биз мутасаддилар биринчи иш кунимиздан истеъфога тайёр бўлиб ишлаганмиз. Лекин ҳамма истеъфога чиқиб кетаверса ким ишлайди? Биз ишимизни 24 соат олиб боряпмиз», деб айтган вазир.