Байден АҚШни Эрон билан ядровий келишувга қайтаришга тайёрлигини тасдиқлади

АҚШнинг сайланган президенти Жозеф Байден Қўшма Штатларни Эрон ядровий дастури бўйича қўшма ҳаракатлар режаси иштирокчилари таркибига қайтаришга тайёрлигини тасдиқлади. У The New York Times нашрига берган интервюсида ана шундай баёнот берди.

 Нашр журналисти АҚШнинг Эрон билан ядровий келишувга қайтиши борасида Байденнинг фикри билан қизиқди.

“Бу осон бўлмайди, лекин ҳа”, – деб жавоб қайтарди Байден.

Унинг сўзларига кўра, бўлажак маъмурият “иттифоқчи ва ҳамкорлар билан музокаралар ва қўшимча келишувлар ишлаб чиқишда қатнашиш”ни мақсад қилган.

Байден мавжуд келишувни “минтақада барқарорликни таъминлайдиган энг яхши восита” деб ҳисоблашини таъкидлади. Унинг фикрича, акс ҳолда Саудия Арабистони, Туркия, Миср ва минтақадаги бошқа мамлакатлар ҳам ядро қуроли ишлаб чиқишга уриниши мумкин.

Аввалроқ Байден президент сайловида ғалаба қозонадиган бўлса, АҚШни ядровий келишувга қайтаришни режалаштирганини айтганди.

Ядровий келишув 2015 йилда Эрон, Россия, Буюк Британия, Хитой, АҚШ, Франция ва Германия томонидан имзоланган. Келишувга кўра, БМТ ҳамда АҚШ ва Евроиттифоқнинг бир томонлама санкциялари бекор қилиниши эвазига Теҳроннинг ядровий ишланмалари чекланади. АҚШ 2018 йилда келишувдан чиқишини эълон қилди ва Эронга қарши иқтисодий санкциялар киритди.