Водийда қуёш атрофини «ўраб» олган ҳалқа нимани англатади?

10 май куни водийликлар ғаройиб ҳодисага гувоҳ бўлишди. Қуёш атрофини камалак рангига монанд ҳалқа ўраб олди.

Ушбу ҳодиса ҳақида олий тоифали география ўқитувчиси Дилфуза Избаева бизга сўзлаб берди.

«Бу ҳодиса фанда ‘гало’ деб аталади. Қуёш ёки Ой атрофида нурли узук пайдо бўладиган оптик ҳодиса. Ушбу ҳодиса юқори тропосферада муз кристалларидан ташкил топган сирус булутлари мавжудлигидан келиб чиқади. Кристалларда ёруғликнинг синиши туфайли юз беради», — дейди география ўқитувчиси.

Эслатиб ўтамиз, Андижон осмонида ноёб ёруғлик пайдо бўлиб сўнгани юзасидан расмий маълумот берилган эди. 

«Икки тахмин бор. Биринчиси, бу космик чиқинди, космик кеманинг ўз вазифасини бажариб бўлган қисми. Иккинчи тахминга кўра, бу космик жисм, астероид парчаси бўлиб, кеча болид кўринишида намоён бўлди», — дея изоҳ берган эди Фанлар академиясининг Мирзо Улуғбек номидаги Астрономия институти директори ўринбосари Юсуфжон Тиллаев.