Қашқадарёда ҳайдовчига носамимий муносабатда бўлган ЙПХ ходимига нисбатан хизмат текшируви тайинланди

Қашқадарё вилояти Қарши туманида хизматдан ташқарида бўлган ЙПХ ходими қоидани бузган ҳайдовчилардан бирига носамимий муносабатда бўлган. Вилоят ИИБ ЙҲХБ ахборот хизматининг хабар беришича, унга нисбатан хизмат текшируви тайинланган.

Маълум қилинишича, 2021 йил 27 июнь куни Дехқонобод тумани ИИБ ЙҲХБ ЙҲХГ ЙПХ инспектори кичик сержант А.Т. Дехқонобод тумани ИИБ бошлиғи номига билдирги билан мурожаат қилиб, яшаш уйи Қарши тумани «Кожор» МФЙга кетган. У уйига яқинлашган вақтда Қарши тумани Ертепа чоррахасидан, «Нексия» машинаси светофорнинг қизил чироғида ҳаракатланиб, А.Т.нинг йўлига чиқиб кетган.

Қайд этилишича, ушбу йўналишда хизматга жалб қилинган Қарши тумани ИИБ ЙҲХБ ЙҲХГ ЙПХ инспектори кичик сержант Б.Б. «Нексия»ни тўхтатган. У ҳайдовчининг ҳужжатларини кўздан кечираётганда кичик сержант А.Т. уларнинг мулоқотига аралашган. У ҳайдовчига қизил чироқдан ҳаракатлангани ва авария ҳолатини келтириб чиқарганини билдирган.

Шундан сўнг, кичик сержант Б.Б. ҳайдовчи Х.О.га содир этган қоидабузарлигини тушунтириб унга нисбатан маъмурий баённома тузган. Ҳайдовчи Х.О. содир этган қоидабузарлиги юзасидан танишиб бармоқ изини босиб тасдиқлаган. Шу вақтда кичик сержант А.Т. фуқаро Х.О.га нисбатан носамимий муносабатда бўлган.

Таъкидланишича, мазкур ҳолат юзасидан А.Т.га нисбатан Дехқонобод тумани ИИБ масъул ходимлари томонидан хизмат текширув ўтказилмоқда.