Қашқадарёда иш пайтида маст ҳолда бўлгани айтилган шифокор ўз аризасига кўра ишдан бўшатилди

Қашқадарё вилояти Чироқчи туманида иш пайтида спиртли ичимлик истеъмол қилиб, беморларга қарамаётгани айтилган шифокор ўз аризасига кўра ишдан бўшатилган. Бу ҳақда вилоят соғлиқни сақлаш бошқармаси хабар бермоқда.

Маълум қилинишича, ижтимоий тармоқларда Чироқчи тумани юқумли касалликлар шифохонасида ишловчи врач Н.Э. иш пайтида спиртли ичимлик ичиб, беморларга қарамаётгани ҳақида видеомурожаат эълон қилинган. Ҳолат вилоят ССБ томонидан ўрганилган.

Қайд этилишича, видеомурожаат эълон қилинган куннинг ўзида ўтказилган нарколог текширувида туман юқумли касалликлар шифохонаси шифокори Н.Э. спиртли ичимлик истеъмол қилмагани аниқланган. Шу куннинг ўзида шифокор ижтимоий тармоқ орқали навбатчиликда қаттиқ чарчагани сабабли бундай ҳолат юз берганини қайд этган ва беморни қабул қилишда сусткашликка йўл қўйгани учун ундан узр сўраган.

Аниқланишича, шифокор Н.Э. воқеадан бир кун аввал тасдиқланган жадвал асосида навбатчиликда бўлган.

Шундан сўнг 34 йил давомида юқумли касалликлар шифокори сифатида фаолият юритган Н.Э. маъмуриятга кексайгани сабабли бундан кейин шифохонада ўз фаолиятини давом эттира олмаслигини маълум қилиб, ўз аризасига кўра ишдан бўшаган.