Сурхондарё вилояти Бойсун туманида ҳайдовчининг пулини ўғирлаган йўловчига жиноий иш қўзғатилган. Бу ҳақда вилоят ИИБ хабар бермоқда.
Маълум қилинишича, 2021 йил 14 июль куни Олтинсой тумани Олмазор маҳалласида яшовчи, А.Шерзод вилоят ИИБга 102 орқали мурожаат қилган. У ўз мурожаатида, ўзига тегишли бўлган «Нексия-1» машинасида Тошкентдан Деновга қайтиб келаётганида йўлда, машина бардачогида турган, 3,5 миллион сўм пулларини ўғирлатиб қўйганини маълум қилган.
Ички ишлар органлари ходимлари томонидан кўрилган чоралар натижасида, ушбу ўғирликни ўша куни А.Шерзоднинг машинасида йўловчи сифатида келган, Денов тумани Боғиэрам маҳалласида яшовчи, Ю.Оғабек содир этганлиги аниқланиб ушланган ва ундан ашёвий далил олинган.
Қайд этилишича, жорий йил 16 июль куни Ю.Оғабекка нисбатан Жиноят кодексининг 169-моддаси 1-қисми билан жиноят иши қўзғатилган.
