Тошкент вилояти ҳокими Даврон Ҳидоятов 12 сентябр куни журналистлар билан бўлиб ўтган очиқ мулоқотда Ўзбекистонда очилиши айтилган, бироқ ҳалигача иш бошламаган IKEA мебел фабрикаси тақдири ҳақида гапирди.
«Тадбиркорларимиз бу масалани таклиф сифатида айтган. Биз ҳам шунақа таклиф бор, деб айтганмиз. Лекин ҳеч қаерда айнан шу лойиҳа бўлади, деган сўз айтилмаган. Масалан, сиз тадбиркорсиз, эртага ёнимга келасиз ва мана бунақа лойиҳам бор, дейсиз. Шундан сўнг, биз у салоҳиятли инвесторми-йўқми, қанча пул тикмоқчи, деб суриштирамиз.
Бу масала ҳалигача очиқ, ёпилгани йўқ. Барибир улар бир кунмас бир кун келади. Бу табиий жараён, чунки Европада ишчи кучи қиммат. Бугун бўлмаса эртага келади», деб Даврон Ҳидоятовнинг сўзларини келтирмоқда Kun.uz мухбири.
Масаланинг барча шартлари тўлиқ келишилмасдан, ҳатто энг бирламчи шартлар ҳал этилмасдан туриб бу лойиҳа нега президентга тақдим этилгани ҳақидаги саволга ҳоким IKEA компаниясининг Туркиядаги ваколатхонаси билан музокаралар олиб борилгани ва томонлар дастлабки келишувга эришгани боис тақдимотга киритилганини айтди.
«Биз ҳеч қачон йўқ нарсани президентга айтмаймиз. Ҳамкорларимиз Швециядаги IKEA (Inter IKEA Systems B.V.) компаниясининг Туркиядаги ваколатхонаси билан музокара олиб бориб, келишувга эришган. Бу ўзидан ўзи бўлмаган.
Гигант компанияларнинг турли давлатларда бўлимлари бор. Компаниянинг Туркиядаги бўлими билан [ўртамизда] келишув бўлган. Матбуотда шов-шув бошлангандан кейин, улар бизга бу нарса жамоатчиликка ошкор бўлиб кетишини кутишмаганини айтишди. Ҳар бир компаниянинг ички йўриқномалари бор. Бу масала дастлабки музокаралар натижасидаги келишув бўлган», деган Даврон Ҳидоятов.
Шу йил 8 феврал куни президент Шавкат Мирзиёев Тошкент вилоятдаги инвестиция лойиҳалари тақдимоти билан танишганди. Тақдим этилган лойиҳалар орасида мебел ва уй жиҳозлари ишлаб чиқариш ҳамда сотиш бўйича дунёдаги энг йирик компаниялардан бири – IKEAнинг Чирчиқ шаҳри ҳудудида қуриладиган мебел ишлаб чиқариш фабрикаси лойиҳаси ҳам бор эди.
