Коррупцияга қарши курашиш миллий кенгаши мажлисига мустақил ОАВ чақирилмади

Ўзбекистонда коррупцияга қарши курашиш бўйича энг олий органнинг кенгайтирилган йиғилиши мустақил нашрлар вакилларисиз ўтди. Сенат матбуот хизмати буни йиғилиш бўлган жойнинг сиғими камлиги билан изоҳлади; Kun.uz'нинг мажлисда эшиттирилган ҳисоботларни тақдим этиш сўровини эса рад этди.

Миллий кенгаш раиси Танзила Норбоева кенгашнинг 9 ноябр кунги кенгайтирилган йиғилишида.
Фото: Сенат ахборот хизмати

Кеча, 9 ноябрь куни Танзила Норбоева раислигида ўтган Коррупцияга қарши курашиш миллий кенгаши мажлисига мустақил оммавий ахборот воситалари таклиф қилинмади.

Сенат матбуот хизмати расмий хабарида тадбирни ОАВ вакиллари ҳам кузатгани айтилади. Бироқ бир нечта манбаларнинг Kun.uz'га тасдиқлашича, мажлисда тўлиқ давлат тасарруфидаги “Ўзбекистон 24” телеканали вакиллари қатнашган холос.

Миллий кенгашда олий таълим ва қурилиш вазирларининг соҳада коррупцияга қарши кураш бўйича ҳисоботлари эшитилган. Бу ҳисоботлар ҳам жамоатчилик учун эълон қилинмаган.

“Мажлисда олий ва ўрта махсус таълим ҳамда қурилиш вазирларининг ҳисоботлари эшитилиб, олий таълим ва капитал қурилиш соҳаларини “коррупциясиз соҳа”га айлантириш бўйича 2022-2023 йилларга мўлжалланган “йўл харитаси”ни ишлаб чиқиш вазифаси топширилди”, – дейилган расмий релизда.

Миллий кенгашнинг 9 ноябр кунги йиғилиши
Фото: Сенат ахборот хизмати

Kun.uz мухбирининг саволига жавобан, Сенат матбуот хизмати раҳбари Мўмин Ибодов Сенатнинг ҳозирги залида кўпроқ журналист чақириш имконияти йўқлиги, ташкилот янги бинога кўчиб ўтганда шароитлар анча яхшиланишини маълум қилди.

У, шунингдек, вазирларнинг ҳисоботлари ОАВга берилмаслигини билдирди.

Олий ва ўрта махсус таълим вазири Абдуқодир Тошқулов Миллий кенгашнинг 9 ноябр кунги йиғилишида ҳисоб бермоқда.
Фото: Сенат ахборот хизмати

Коррупция мавзусидаги мажлис мустақил ОАВга ёпиқ эшиклар ортида ўтиши биринчи марта эмас.

2019 йил декабрь ойида ўша вақтдаги Коррупцияга қарши курашиш бўйича республика идоралараро комиссиясининг йиғилиши комиссиянинг ишчи органи – Бош прокуратурада бўлиб ўтган эди. Унда соғликни сақлаш тизимидаги кўплаб коррупциявий жиноятлар, дори-дармон “бизнеси”, психотроп моддалар ноқонуний савдоси ва тизимдаги молиявий жиноятларга доир фактлар эълон қилинган эди.

Лекин, орадан бир ой ўтиб, комиссиянинг олий таълим соҳасига бағишланган йиғилишига ОАВ чақирилмаган эди.

Мустақил журналистларни кенгайтирилган мажлисига чақирмаган Коррупцияга қарши курашиш миллий кенгаши ҳам аслида 2020 йилда Коррупцияга қарши курашиш бўйича республика идоралараро комиссияси ўрнига ташкил этилган.

Коррупцияга қарши курашиш миллий кенгашининг раиси – Сенат раиси Танзила Норбоева, унинг ўринбосари – Қонунчилик палатаси Спикерининг биринчи ўринбосари Акмал Саидов. Бундан ташқари, Миллий кенгаш таркибидан деярли барча вазирлар ва давлат ташкилотларининг раҳбарлари ўрин олган.

Миллий кенгашни тузиш бўйича чиқарилган президент фармони асосида Коррупцияга қарши курашиш агентлиги ҳам ташкил этилган. Агентлик Миллий кенгашнинг ишчи органи этиб белгиланиб, унга кенгаш томонидан қабул қилинган қарорларнинг ижросини ташкил этиш вазифаси юкланган.

Кейинроқ, Тошкент шаҳар ва барча вилоят ҳокимлари Коррупцияга қарши курашиш ҳудудий кенгашларининг раислари деб белгиланди. Бу ҳолат жамоатчиликда турли саволларни келтириб чиқарди.

Коррупцияга қарши курашиш агентлиги директори Акмал Бурҳонов эса миллий кенгаши раиси аввалгидек бош прокурор эмас, Сенат раиси эканидан келиб чиқилса, унинг маҳаллий бўғинларига маҳаллий депутатлик кенгаши раиси, яъни ҳокимлар раҳбарлик қилиши мантиқан тўғри эканини айтди ҳамда журналист ва блогерларни ҳокимларга нисбатан холис ёндашишга чақирди.