Президент борти яна Нукусга учди

Ўзбекистон президентига хизмат қилувчи биринчи борт сўнгги 24 соат ичида иккинчи бор Нукусга йўл олди. 3 июлга ўтар кечаси Қорақалпоғистонда фавқулодда ҳолат режими эълон қилинган.

Ўзбекистон президенти Шавкат Мирзиёевнинг борти яна Нукусга учмоқда. Бу ҳақда Flightradar24 сайти хабар бермоқда.

Давлат раҳбари 2 июл куни куни оммавий намойишлар бўлиб ўтган Қорақалпоғистон пойтахтида бўлиб қайтганди.

Қорақалпоғистондаги тартибсизликлар маҳаллий аҳоли вакиллари Конституцияга мазкур ҳудуд мақомини ўзгартиришни назарда тутувчи ўзгартиришлардан норозилиги билан боғлиқ.

Асосий қомусга ўзгартиришлар киритиш бўйича қонун лойиҳаси 26 июн куни жамоатчилик муҳокамаси учун эълон қилинганди. Кейинги кунларда ижтимоий тармоқларда қорақалпоғистонликлар флешмоб уюштириб ўз норозиликларини билдиришди. 1 июл куни эса Нукус шаҳри марказида оммавий намойиш бошланди.

Шавкат Мирзиёев 2 июл куни Нукусда депутатлар, жамоатчилик фаоллари билан учрашиб, Конституциянинг Қорақалпоғистонга тегишли қисмлари ўзгаришсиз қолишини айтди.

Айни вақтда шаҳарда намойишлар тинчиган. Президент фармони билан фуқароларнинг хавфсизлигини таъминлаш, уларнинг ҳуқуқ ва эркинликларини ҳимоя қилиш, қонунийлик ва ҳуқуқ-тартиботни тиклаш мақсадида Қорақалпоғистон Республикаси ҳудудида 2022 йил 3 июл куни соат 00:01 дан 2022 йил 2 август куни соат 00:00 га қадар бўлган даврда фавқулодда ҳолат жорий этилган.

#Қорақалпоғистон #Нукус #Шавкат Мирзиёев

1-2 июл кунлари Қорақалпоғистон маркази Нукус шаҳрида тартибсизликлар кузатилди. Миллий гвардия ходимлари билан тўқнашувларда 200 дан ортиқ киши яраланган, 18 киши ҳалок бўлган.