Сурхондарёда тадбиркорга кредит ажратиб бериш эвазига 10 миллион сўм олган банк ходими ушланди

Бош прокуратура ҳузуридаги департаментнинг хабар беришича, департаментнинг Сурхондарё вилоят бошқармаси томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилган.

Тадбирда, “Ипотека-банк” АТИБ вилоят филиалининг шуъба мудири Х.Т. “L.S.” МЧЖга қарашли Шўрчи туманидаги ишлаб чиқариш цехи биносини таъмирлаш учун 500 миллион сўм кредит ажратиб бериш эвазига 10 миллион сўм олган вақтида ашёвий далиллар билан ушланган.

Қайд этилишича, мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Аввалроқ, Сурхондарёда қалбаки квитанция билан фуқаронинг пулини ўзлаштирган банк ходимига жиноят иши қўзғатилганди.