Украинадаги 12,4 трлн долларлик конлар Россия назоратига ўтди – экспертлар

Канаданинг геосиёсий хатарларни ўрганиш билан шуғулланувчи SecDev компанияси 2014 йилдан буён Россия назоратига ўтган Украина табиий  бойликлари таҳлилини ўтказди.

Экспертларнинг баҳолашича, ҳозирда Россия Украинадаги $12,4 трлн долларлик фойдали қазилмалар конларини ўз назоратига олган.

Бу компания ўрганган 2209та кон қийматининг қарийб ярмини ташкил этади. Компаниянинг билдиришича, Украина Россия назоратига ўтган ҳудудлар билан биргаликда 63 фоиз кўмир, 42 фоиз металл, 33 фоиз нодир металл, 20 фоиз нефт, 11 фоиз табиий газ конларини йўқотган.

SecDev маълумотига кўра, Россия “махсус операция” давомида 41та кўмир, 27та табиий газ, 14та пропан, 9та нефт, 6та темир рудаси, 2та титан рудаси, 2та цирконий рудаси конларини қўлга киритган. Шунингдек, биттадан стронций, литий, уран, олтин конлари ва йирик оҳак карьери россияликлар назоратига ўтган. 

Қайд этилишича, Украина ўз конларининг учдан икки қисмидан бутунлай айрилиши мумкин.