Беш мамлакат фуқаролари бўлган ўн нафар кўнгилли озод қилингани ҳақида чоршанба куни Саудия Арабистони ташқи ишлар вазирлиги эълон қилди, гап Марокаш, АҚШ, Британия, Швеция ва Хорватия фуқаролари ҳақида кетаётгани айтилди, аммо хабарда уларнинг шахсига аниқлик киритилмади.
Вазирлик баёнотида хорижлик кўнгиллилар валиаҳд шаҳзода Муҳаммад ибн Салмон воситачилигида Украина ва Россия ўртасидаги ҳарбий асирлар алмашинуви доирасида амалга оширилгани маълум қилинган.
Кейинроқ, Украина раҳбарияти украиналик ҳарбий асирларнинг катта гуруҳи озод қилингани, улар орасида «Азовстал» мудофаасида иштирок этган қўмондонлар ҳам борлигини эълон қилганида кимлар кимларга алмаштирилгани аён бўлди.
АҚШ давлат котиби Энтони Блинкен ва Украина президенти офиси раҳбари Андрей Ермакнинг баёнотларидан маълум бўлишича, хорижлик ёлланма жангчилар 55 нафар россиялик ҳарбий асир ва Путиннинг яқин одами Виктор Медведчукка алмаштирилган. Бу келишув доирасида яна 200 нафар украиналик ҳарбий ва «Азовстал»ни мудофаа қилган «Азов» полкининг беш нафар қўмондони ҳам асирликдан қайтган.
Британия соғлиқни сақлаш вазири Роберт Женрик озод қилинган британияликлардан бирининг шахсини ошкор қилди - Эйден Аслин.
«Мен ўзимнинг сайлов округимда истиқомат қилган Эйден Аслин ва Россия ҳукумати тутиб турган бошқа британиялик ҳарбий асирлар ниҳоят озодликка чиққани ва Британияга қайтаётганидан мамнунман» деб ёзди вазир.
Қолганларнинг номлари расман эълон қилинмаган, аммо «ДХР»да бу асирларнинг суд жараёни саҳналаштирилганидан келиб чиқиб, BBC ва бошқа нашрлар катта эҳтимол билан гап Шон Пиннер, Жон Ҳардинг, Эндрю Ҳилл ва Дилан Ҳили ҳақида кетаётганини ёзмоқда.
Мариуполда асир тушган яна бир британиялик намойиш этилди
«ДХР»да яна икки британиялик асирни суд қилишмоқчи. Улар ҳақида нималар маълум?
Июн ойида Эйден Аслин ва Шон Пиннер билан биргаликда марокашлик Саадун Иброҳим ўлимга ҳукм қилинганди. Марокашлик асир ҳам айни вақтда Саудия Арабистонида бўлиб турибди.
