Россия расмийлари илк бор Украинадаги урушда сафарбар қилинган аскарлар ҳалок бўлганини тан олди

«Афсуски, ҳарбий комиссариат Коркино ҳарбий комиссарлигидан юборилган беш нафар жанубий ураллик ҳалок бўлгани ҳақидаги маълумотни тасдиқлади. Ҳалок бўлган аскарларимизнинг оила аъзолари ва яқинларига барча зарур ёрдамни кўрсатамиз», — дейилади област маъмурияти матбуот хизмати баёнотида.

Челябинск области маъмурияти қурбонларнинг қариндошларига федерал тўловлардан ташқари ҳар бирига бир миллион рублдан маблағ ажратишга ҳам ваъда берган.

Сентябр ойи охиридан бери сафарбар қилинган ўнлаб россияликлар жанговар ҳудудларга етиб бормасданоқ ҳалок бўлгани ҳақида хабарлар тарқалди. Фронтдаги сафарбар қилинганларнинг ўлими ҳақидаги илк хабарлар эса шу ҳафта бошида пайдо бўла бошлади, бироқ ҳукумат уларга изоҳ бермади.

10 октябр куни «Вечерний Карпинск» нашри сентябр ойи охирида сафарбар қилинган Карпинск (Свердловск области) шаҳри аҳолисининг уч вакили Херсон яқинида ҳалок бўлгани ҳақида хабар берди.

«It’s My City» нашри эса Свердловск областининг Краснотуринск шаҳридан бўлган, 28 сентябр куни сафарбар қилинган Евгений Бизяевнинг ўлими ҳақида ёзди.

Ҳуқуқ ҳимоячиси Павел Чиков 12 октябр куни урушга сафарбар қилинган россиялик биринчи адвокат, петербурглик Андрей Никифоров Украинада ҳалок бўлганини маълум қилган. Унинг сўзларига кўра, адвокат 25 сентябр куни сафарбар қилинган ва Лисичанск шаҳри (Луҳанск области, ҳозирда Россия қўшинлари назорати остида) яқинида ҳалок бўлган.

Сафарбар қилинган россияликлар ўлими сабаблари номаълум. 29 сентябр куни Россия Мудофаа вазирлиги тайёргарликдан ўтмаган аскарларни фронтга жўнатмасликка ваъда берган эди.

BBC муҳаррири Илья Абишев нега сафарбар қилинганлар бунчалик тез фронтга юборилаётганига изоҳ берди:

«Захирадан чақирилган ҳарбий хизматчилар зудлик билан жанговар ҳудудга жўнатилаётганининг икки асосий сабаби бор:

Украинада жанг қилаётган Россия қўшинлари жиддий шахсий таркиб етишмовчилигига дуч келмоқда. Бу кенг миқёсли жанговар ҳаракатларни амалга ошириш учун бошиданоқ етарли тирик кучлар тўпланмагани ва кўрилган йўқотишлар: ҳалок бўлганлар, ярадорлар, касаллар, маҳбуслар ва дезертирлар билан боғлиқ.

Кўплаб бўлинмаларнинг штатлари меъёрдан анча кам ва Украина армияси ташаббусга эга бўлган шароитда Россия қўмондонлиги захирадагиларни тайёрлаш учун кўп вақт сарфлай олмайди. Шу сабаб баъзида улар сафарбар қилинганларни хавфли йўналишларга дарҳол ташлаши керак бўлмоқда.

Собиқ «захирадагилар» қайта тайёргарликдан ўтказилмасдан олдинги чизиққа ташланишининг яна бир сабаби — Россия қўмондонлигида бир вақтнинг ўзида бундай катта сондаги сафарбар қилинганларни тайёрлаш учун ўқув базаси йўқлигидир.

Ижтимоий тармоқларда сафарбар қилинганларнинг ноқулай яшаш шароитларидан шикоят қилгани билан боғлиқ кўплаб видеороликлар мавжуд. Қолаверса, бу видеолардан ўқув базаларида офицерлар ва инструкторлар етишмаслиги, аниқ кундалик тартиб йўқлиги, сафарбар қилинганлар жанговар тайёргарлик ўрнига қадам ташлаш ва кераксиз конструкцияларни ўрганаётганини кўриш мумкин.

«Сафарбар қилинганлар, шунингдек аллақачон Украинага асир тушганларнинг кўрсатмаларини ўрганиб чиқиб, биз жанговар тажрибага эга, аммо энг қийин ҳарбий мутахассислиги бўлмаган аскарлар дарҳол фронтга жўнатилмоқда деган хулосага келишимиз мумкин. Бу мотоўқчилар, десантлар, чегарачилар, денгиз пиёдалари ва бошқа ҳарбий қисмларнинг вакиллари бўлиши мумкин», — дейди Абишев.

Мисол учун, агар шахснинг ҳарбий гувоҳномасида ВУС (ҳарбий мутахассислик) 124259 (БТР ҳайдовчиси) ёки 101627 (пулемётчи) белгиси бўлса, Россия қўмондонлиги бундай аскарга қўшимча тайёргарлик шарт эмас деб ҳисобламоқда. Улар аскар захирада бўлган йилларда қуроллар ўзгарган бўлиши мумкинлигини инобатга олгани йўқ ва агар аскар бирор нарсани унутган бўлса, у жанг майдонида тезда буни эслайди дея ўйламоқда.

Бироқ, ҳақиқий жанговар вазиятда алоҳида ҳарбий хизматчининг маҳорати ҳар доим ҳам ҳал қилувчи роль ўйнамайди. Бўлинмаларни жанговар мувофиқлаштириш, ўзаро ҳамкорликни ташкил этиш, бир-бирини мукаммал тушуниш қобилияти жангларда кўпроқ аҳамиятга эга бўлади. Шунингдек, маҳаллий ерларни, кучлар мувозанатини, муайян шароитларда жанговар ҳаракатлар олиб боришнинг ўзига хос хусусиятларини, ўзининг ва душманнинг имкониятларини баҳолаш ва бошқалар аскар учун жуда муҳимдир.

Жангчининг ҳеч қандай шахсий маҳоратлари бу билимлар ўрнини боса олмайди ва буларни урушда ўрганиш анча кеч бўлган бўлади.