Сурхондарёда ўзига тегишли 1 гектар ерни 100 минг долларга сотмоқчи бўлган фермер ушланди

Фермер келишилган пулдан 20 минг долларини олаётганда ашёвий далиллар билан қўлга олинган.

Фото: iStock

Маълум қилинишича, 2022 йил 23 ноябр куни ДХХ Сурхондарё вилояти бошқармаси ҳамда Бош прокуратура департаментининг Денов туман бўлими билан ҳамкорликда ўтказилган тезкор тадбирда 100 минг АҚШ долларига ер сотишни режалаштирган шахс қўлга олинган.

Денов туманида яшовчи, “Қорахон Халифа Денов” фермер хўжалиги раиси М.Х. ўзи раҳбарлик қилаётган хўжаликка тегишли бўлган 1 гектар ерни фуқаро И.Қ.га 100 минг АҚШ долларига сотишга келишиб, ушбу пуллардан 20 минг долларини олаётган вақтда ашёвий далиллар билан жиноят устида қўлга олинган.

Аввалроқ, Тошкент вилояти Бўстонлиқ туманида 11 гектар ерни 550 минг долларга сотмоқчи бўлган шахслар ушланганди.

Тайёрлаган: Ғайрат Йўлдошев

#ер #фермер #Сурхондарё вилояти