Янгиҳаёт туманида авария ҳолатидаги уйлар бузилиб, реновация дастури амалга оширилади

Тошкент шаҳар ҳокимлиги, Уй-жой коммунал вазирлиги, Қурилиш вазирлиги, Иқтисодий тараққиёт вазирлиги, Молия вазирлигининг қуйидагиларни назарда тутувчи 2022-2026 йилларда эксплуатация муддатини ўтаб бўлган ва маънан эскирган кўп квартирали уйларни бузиб, мулкдорларни янги уй-жойлар билан таъминлаш мақсадида Тошкент шаҳри Янгиҳаёт туманида реновация дастурини амалга ошириш тўғрисидаги таклифига розилик берилади:

а) компенсация тўлаш:

• биринчи навбатда – бузиладиган авария ҳолатидаги хонадонда истиқомат қилаётган мулкдорга қуриладиган кўп квартирали уйлардан “фойдаланишга тайёр ҳолда топшириш” шарти асосида бузилган хонадон майдонига тенг ёки ундан кам бўлмаган квадрат метрдаги хонадонни бепул ажратиш;
• иккинчи навбатда – мулкдор ёзма ва нотариал тасдиқланган розилиги асосида бузилган хонадон ўрнига иккиламчи бозордан хонадон майдонига тенг ёки ундан кам бўлмаган квадрат метрдаги хонадон олиб бериш;
• учинчи навбатда – бузиладиган уй-жой мустақил баҳоловчи ташкилот томонидан аниқланган қийматини мулкдорга белгиланган тартибда тўлаб бериш орқали амалга оширилади.
• Бунда, мулкдорга янги хонадон топширилгунга қадар оила аъзолари билан бирга вақтинча яшаш учун мос равишда талабгор тадбиркорлик субъектлари ўз маблағлари ёки буюртмачи ташкилотлар орқали Тошкент шаҳар маҳаллий бюджети қўшимча манбалари ҳисобидан ижара шартномаси асосида турар жой ажратилади ва ижара ҳақи тўлаб берилади;

б) буюртмачи этиб:

• тадбиркорлик субъектлари – авария ҳолатидаги уйлар жойлашган ҳамда улар мулкдорларига тегишли бўлган туташ ер участкасида уй-жойлар қурилишига ташаббус билдирган ва танлов асосида аниқлаб олинган тадбиркорлик субъекти;
• Тошкент шаҳар ҳокимлиги ҳузуридаги “Ягона буюртмачи хизмати” инжирининг компанияси – авария ҳолатидаги уйлар жойлашган ҳамда улар мулкдорларига тегишли бўлган туташ ер участкасида уй-жойлар қурилишида талабгор бўлган тадбиркорлик субъектлари мавжуд бўлмаган ҳолларда;

в) молиялаштириш:

• тадбиркорлик субъектлари буюртмачилигида – ўз маблағлари, жалб қилинган тижорат банклари кредитлари ва қонун ҳужжатларида таъқиқланмаган бошқа манбалар ҳисобидан;
• давлат буюртмачиси – Тошкент шаҳар маҳаллий бюджети қўшимча манбалари ҳисобидан амалга оширилади;

г) реновация ҳудудлари:

• уй-жой қуриш учун талабгор тадбиркорлик субъектлари мавжуд бўлган ҳудудларда – бузиладиган авария ҳолатидаги уйлар ўрнига кўп квартирали уйни қуриб бериш шарти билан мулкдорлар, Янгиҳаёт тумани ҳокимлиги ҳамда танлов асосида аниқланган талабгор тадбиркорлик субъектлари ўртасида инвестиция мажбурияти асосида уч томонлама шартнома расмийлаштирилади ҳамда халқ депутатлари Тошкент шаҳар кенгаши қарори билан белгиланади;
• талабгор тадбиркорлар мавжуд бўлмаган ҳудудларда – бузиладиган авария ҳолатидаги уйлар ўрнига қуриладиган янги уй-жойлар қурилиши давлат буюртмачисига халқ депутатлари Тошкент шаҳар кенгаши қарори билан белгиланади;
• д) бузиладиган авария ҳолатидаги уйлар ўрнидан ташқари ёки мулкдорларга тегишли бўлмаган бошқа ҳудудда ҳудуд ишлаб чиқилган бош режасига мувофиқ аниқ қуриладиган объект турини кўрсатган ҳолда мулк ҳуқуқи ёки ижара ҳуқуқи асосида электрон-онлайн аукцион орқали реализация қилинади.

Белгиланишича:

• реновация дастури доирасида авария ҳолатидаги уйларни бузиш улар мулкдорларига ўрнатилган тартибда белгиланган компенсация қоплаб берилганидан сўнг рухсат берилади;
• реновация ҳудудида жойлашган кўп йиллик қимматбаҳо дарахтлар ва буталарни сақлаб қолган ҳолда ҳамда уларга зарур агротехник ишлов бериш шартларида қурилиш ишлари амалга оширилади;
• авария ҳолатидаги уйлар ўрнига Тошкент шаҳар ҳокимлиги томонидан тасдиқланган батафсил режалаштириш лойиҳаси асосида қуриладиган янги уй-жойларда бузиладиган авария ҳолатидаги уйлар мулкдорларидан ортган хонадонлар белгиланган тартибда реализация қилинади;
• Бунда, мазкур ортган хонадонларга президент фармонлари билан белгиланган ва бозор тамойилларига асосланган ипотека кредитлари орқали аҳолини уй-жой билан таъминлаш янги тартибидан фойдаланишга рухсат берилади;
• тадбиркорлик субъекти томонидан инвестиция киритиш бўйича тузилган шартнома шартлари бажарилмаган тақдирда, реновация ҳудудини белгилаш тўғрисидаги халқ депутатлари Тошкент шаҳар кенгаши қарори бекор қилинади;
• ташқи муҳандислик коммуникациялари – ичимлик суви ва ирригация таъминоти, кириш йўллари Тошкент шаҳар ҳокимлиги ҳузуридаги “Ягона буюртмачи хизмати” инжиниринг компанияси буюртмачилигида Тошкент шаҳар ҳокимлиги ҳузуридаги Тадбиркорлик инфратузилмасини ривожлантириш жамғармаси маблағлари ҳисобидан амалга оширилади.

Реновация ҳудудларига ташқи электр энергияси, табиий газ етказиб бериш ва алоқа тармоқларига улаш – тегишлича “Ҳудудий электр тармоқлари”, “Ҳудудгазтаъминот”, “Ўзбектелеком” томонидан бериладиган техник шартлар асосида, буюртмачилар ўз маблағлари ҳисобидан амалга оширилади.