«Ҳарбий нуқтайи назардан, агар ракеталар Полша чегарасидан Украина ҳудудидаги маълум масофага жойлаштирилса, Полша ҳудудини ҳимоя қилиш учун яхшироқ бўларди», — деди Дуда Вилнюсда.
Шунда ҳаво ҳужумидан мудофаа иккала давлатни ҳам энг самарали ҳимоя қила олади, деди у.
«Бироқ, жойлаштириш тўғрисидаги қарорни ушбу тизимга эга бўлган давлат, яъни Германия томони қабул қилади», деб давом этди Дуда.
Унинг сўзларига кўра, агар Германия Украинага Patriots'ни жойлаштиришга рози бўлмаса, улар Полшага жойлаштирилиши мумкин.
Бундан олдин Германия ҳукумати раҳбари Олаф Шольц Россиянинг Украинага қарши бошлаган уруши тўхтамагунча, Украина Қуролли кучларини зарур қуроллар билан таъминлашга ваъда берганди.
Германия канцлери Олаф Шольц Бундестагда 2023 йилги бюджет лойиҳаси тўғрисида муҳокамалар бўйича сўзга чиқди. «Айнан мана шу ҳукумат – ўн йиллик давлат амалиётига зид равишда – Украинани кунлик жасоратли мудофаа курашида зарур бўлган қуроллар билан қўллаб-қувватлашга қарор қилди», деди у.
«Бизнинг энг яқин иттифоқчиларимиз билан елкама-елка, - дея қўшимча қилди социал-демократик канцлер, - Биз буни маъносиз, шафқатсиз, жиноий уруш тўхтатилмагунча қиламиз».
Германия ҳукумати раҳбари яна бир бор Россияни бу урушни тўхтатишга чақирди ва яқинда Индонезияда бўлиб ўтган G20 саммитига эътибор қаратди: «Балидаги G20 саммити бу борада Москвага муносиб ва жуда аниқ сигнал юборганлиги муҳим. Яна бир нарсани G20 гуруҳининг барча аъзолари таъкидладилар: ядро қуролидан фойдаланишнинг ҳар қандай таҳдиди барчамиз учун мутлақо номақбулдир, улардан фойдаланишга тоқат қилиб бўлмайди».
