Хитой айни дамда йирик коронавирус эпидемиясини бошдан кечирмоқда. Мамлакатдаги крематориялар тўлиб кетган, одамлар ўлган қариндошларининг жасадларини ёқиш учун яширин бизнесга ортиқча пул тўлашга мажбур бўляпти.
Хитойда коронавируснинг ҳозирги гигант тўлқини фонида ўлим ҳолатлари кескин ошгани сабабли бутун мамлакат бўйлаб крематориялар тўлиб кетди, мамлакатда дафн этиш саноати фалаж ҳолатида, деб хабар берди Bloomberg 4 январь, чоршанба куни вазиятдан хабардор манбаларга таяниб. «Йирик шаҳарлардаги дафн маросим уйлари тўла, баъзи экспертлар энг ёмони ҳали олдинда деб огоҳлантирмоқда», дейилади материалда.
Пекиндаги дафн маросими уйларидан бирининг хабар беришича, ҳар куни тахминан 140-150 жасад куйдирилади, бу аввалгисидан 40 тага кўп. Айни пайтда, Лонгхуадаги (Шенчжен тумани) крематорийлардан бирида ҳар куни 500 га яқин жасад ёндирилишини айтишди - бу кўрсаткич ўртача кўрсаткичдан беш баравар юқори. Пекин ва Шанхайдаги крематорий ишчиларининг айтишича, энг яқин бепул кремация жойини фақат январь ойининг ўрталарида бронь қилиш мумкин. Баъзи дафн маросими ташкилотлари онлайн навбат тизимига ўтди.
Вloomberg агентлигининг қайд этишича, Хитойда жасадларни куйдириш бўйича махфий бизнес ривожланган. Агар илгари кремация бир неча минг юанга тушган бўлса, январь ойида баъзи крематориялар ўн минглаб юанларни талаб қила бошлади. Шундай қилиб, уч кун давомида кремация қилиш 68 000 юанга, ўлим куни эса 88 000 юан тўлаш керак.
Хитойда коронавирус инфекциясининг кескин ўсиши декабрь ойи бошидан бери тўхтамаяпти. Бу мамлакат локдаунларга қарши норозилик намойишлари туфайли карантин чораларини юмшатишга қарор қилганидан кўп ўтмай бошланди. Хитой ҳукумати COVID-19 ҳақидаги кундалик маълумотларни эълон қилишни тўхтатди. Норасмий маълумотларга кўра, Хитойда ҳар куни миллионлаб одамлар ковид билан касалланяпти.
Британиянинг Airfinity таҳлилий компаниясининг ҳисоб-китобларига кўра, декабрь ойи охирида Хитойда кунига 9000 га яқин одам коронавирус инфекциясидан вафот этган. Airfinity прогнозларига қараганда, ўлимлар 23 январь кунига келиб бир кунда тахминан 25 минг кишини ташкил қилади ва декабрдан бошлаб ковиддан ўлганларнинг умумий сони 584 мингга етади.
Европа Иттифоқи Пекинга оммавий эпидемияни бартараф этишга ёрдам бериш учун бепул COVID-19 вакциналарини таклиф қилди. Хитойда инфекциялар сони ортиб бораётган бир пайтда, ўтган ҳафта бир қатор давлатлар, жумладан Италия, АҚШ, Япония, Ҳиндистон ва Малайзия Хитойдан ташриф буюрувчилар учун мажбурий тестдан ўтиш жараёнини тасдиқлади. Германия ҳали буни йўлга қўймади. Европа Иттифоқи Хитойдан ташриф буюрувчиларни мажбурий тестдан ўтказиш учун ягона талабларни жорий этиш имкониятини муҳокама қилмоқда.
